Милошоски да не ја замајува јавноста дека до ВМРО–ДПМНЕ стигнале некакви договори кои отвораат сомнеж за корупција во АД ЕСМ или РЕК Битола, реагираат од СДСМ на обвинувањата на опозицијата за штетни договори за ископ на јаглен.
„Станува збор за јавно достапни документи и секој може до нив да пристапи преку системот за јавни набавки. Сите договори на кои се повикува Милошоски ги поминале сите правни процедури предвидени во македонското законодавство, вклучувајќи и жалби и одлуки на надлежни инстанци. Милошоски обвинува за намерно одолговлекување на постапката за набавка на сопствена механизација за потребите на ПЕ Рудници на РЕК Битола, а комбинатот и АД ЕСМ се во фаза на потпишување на договори за набавка на механизација, што беше соопштено пред пет дена. Ова е само прва фаза од набавката на сопствена механизација за потребите на рудниците на РЕК Битола. Ќе следуваат уште толку колку што е потребно до целосно задоволување на потребите, за разлика од времето на ВМРО-ДПМНЕ , кога од 2006 до 2017 година за РЕК Битола биле набавени само неколку половни автобуси за превоз на работниците“,
се вели во соопштението.
Во врска со состојбите во РЕК Осломеј, се додава во соопштението, го потсетуваме Милошоски дека комбинатот во моментов се наоѓа во фаза на трансформација и ќе произведува електрична енергија од обновливи избори.
„Успесите на ВМРО-ДПМНЕ во енергетскиот сектор се корупцијата, негрижата и недомаќинското работење, а увозот на најскапа струја во историјата на компанијата по цена од 220 евра за MWh во време кога партискиот лидер Христијан Мицкоски беше на чело на Државните електрани е нивното најголемо достигнување. Го повикуваме Антонијо Милошоски барем еднаш да постапи коректно и да се извини за изречените лаги“,
се вели во соопштението.
Од СДСМ порачаа наместо Милошоски да држи прес-конференции на кои, како што велат, шири лажни вести, треба да ја спрема својата одбрана во случајот „Моќник“ и да се соочи со одговорност.
„Лицемерно ВМРО-ДПМНЕ да шири невистини за наводна корупција без притоа да понуди какви било докази, бидејќи такво нешто и не постои. Милошоски неосновано напаѓа цела компанија, бројни вработени само заради тоа што токму Ковачевски ја објави вистината за Милошоски во 2015 година“,
се вели во соопштението.