Заради штетните договори во РЕК цената на произведен киловат час електрична енергија се зголемува за 20 отсто, обвини на денешната прес-конференција Антонијо Милошоски од ВМРО-ДПМНЕ.
„До ВМРО-ДПМНЕ стигнаа 11 склучени договори за ископ во вкупна вредност од околу 4 милиони евра, пари кои ќе се дадат за изнајмување на машини од приватни фирми, за ископ на јаглен, при што цената за ископ на еден тон јаглен се зголемува од 15 на 30 евра за еден тон. Ова е двојно зголемување на цената за ископ на јаглен што влијае на рентабилноста на АД ЕЛЕМ и на цената на струјата што ја плаќаат граѓаните“,
рече Милошоски.
Тој порача дека директорот Васко Ковачевски би требало да си даде оставка од раководната позиција во АД ЕЛЕМ, заради како што рече, лакомоста за профит на приватни лица и фирми блиски до фамилијата на власт.
Заради овие договори, вели Милошоски, производствената цена во РЕК Битола се зголемува за 20 проценти за киловат час електрична енергија.
„20 проценти поскапа струја во РЕК Битола кон ЕЛЕМ значи 20 проценти поскапа струја кон ЕВН. Таа разлика понатаму ќе ја плати АД ЕЛЕМ со загуби или ќе ја платат граѓаните преку поскапа струја. Но, бидејќи АД ЕЛЕМ е Акционерско друштво во државна сопственост загубите на крајот и на АД ЕЛЕМ по втор пат ќе ги платат граѓаните кои што го полнат Буџетот“,
рече тој.
Милошоски го повика Ковачевски да ги раскине договорите или, како што рече „да го праша Заев дали смее да си поднесе оставка од АД ЕЛЕМ“.
Како и да е доколку не постапи на ваков начин, тоа ќе резултира со негова одговорност, додава Милошоски.
„Производството на струја во РЕК по методите на Ковачевски и Заев станува нерентабилно за државата и станува многу скапо за граѓаните. Ваквите двојни цени за ископ на јаглен значат зголемен профит за поединци блиски до фамилијата на власт а цената на крајот сепак ја плаќа народот. Повторно ќе гледаме како камиони со струмички таблици како работат во РЕК Битола, повторно ќе гледаме како Силјан Мицевски зголемува милиони на своето салдо, додека едвај народот преживува од месец до месец“,
порача Милошоски.