Претставниците на СДСМ и на ДУИ во Владата велат дека нема победници или губитници во однос на тоа што засега не помина предлог-мерката која ја презентираше лидерот на социјалдемократите Зоран Заев да има кратење на платите во јавниот сектор. Нешто на што ДУИ се противеше.
Премиерот Оливер Спасовски презентираше нов пакет мерки кои ги донела Владата, а тоа што споменатиот предлог за јавниот сектор не е во тој пакет, тој вели дека е резултат на аргументите и анализите на бројки што ги правел економскиот тим во Владата.
„Не станува збор за добивање битка, ако некој смета дека во услови на кризи може да добива политички битни, многу се лаже и многу греши“,
рече Спасовски.
Тој вели дека во Владата сметале дека првичната мерка треба да се однесува на функционерите, односно тие да се солидаризираат, па затоа сега е донесена одлука на минимална плата да одат сите именувани и избрани функционери.
„Но, имаме временски период во кој треба да следиме и анализираме. Ние посакуваме здравствената криза да трае што е можно пократко. Ако таа трае што е можно пократко, тогаш ефектите од ударот врз економија ќе бидат што е можно помали“,
вели Спасовски.
Дека не станува збор за тоа дали победил еден или друг од коалициските партнери, порача и министерот за економија од ДУИ, Крешник Бектеши.
„Имаме одлични односи внатре во Владата. Не се водела никаква битка, нема победници ниту губитници. Ги зедовме предвид сите предлози“,
рече Бектеши.