Обвинувањата на опозицисиата партија до власта на тема евроинтеграции доаѓаат по вчерашните пристапни конференеции на четири земји кандидатки за члество во Унијата – Црна Гора, Украина, Молдавија и Албанија, што еврокомесарката за проширување Марта Кос и ирскиот министер за европски прашања Томас Берн ги оценија како „супервторник“ за проширувањето на ЕУ
Опозицискиот Социјалдемократски сојуз на Македонија (СДСМ) денеска повторно го обвини премиерот Христијан Мицкоски дека ја држи земјата во изолација додека други земји кандидатки напредуваат на патот кон Европската Унија.
Обвинувањата на опозициската партија до власта на тема евроинтеграции доаѓаат по вчерашните пристапни конференеции на четири земји кандидатки за члество во Унијата – Црна Гора, Украина, Молдавија и Албанија, што еврокомесарката за проширување Марта Кос и ирскиот министер за европски прашања Томас Берн ги оценија како „супервторник“ за проширувањето на ЕУ.
„Додека четири земји направија нов чекор напред кон Европската Унија, Македонија повторно останува заглавена. Ова не е резултат на надворешни околности, туку директна последица од политиката на Христијан Мицкоски и негова криминална организација ВМРО“,
се вели во соопштението од СДСМ.
Оттаму посочуваат дека Европската Унија не е само политички проект, туку значи повеќе средства, фондови, подобар живот и отворање можности за сите граѓани. Европската Унија, додаваат од партијата, значи дека младите ќе можат да останат во својата земја, да градат семејства и да имаат перспектива, секој работник да може нормално да живее, а повозрасните да имаат достоинствена пензија. Дополнително, членството во ЕУ значи и крај на чекањето со часови на граница, додаваат од СДСМ.
Оттаму наведуваат дека наместо да ја искористи шансата, премиерот Христијан Мицкоски ја држи Македонија во изолација.
„Со блокирање и со неисполнување на реформите, тој свесно ги затвора вратите за европските фондови, за инвестиции и за подобар животен стандард. Додека други земји напредуваат и им обезбедуваат на своите граѓани европска иднина, Мицкоски ја осудува Македонија на стагнација и сиромаштија. Европа нуди подобра иднина. Мицкоски ја одбира изолацијата“,
велат од Социјалдемократскиот сојуз.
Еврокомесарката за проширување Марта Кос вчера на социјалната платформа Икс напиша дека е „супервторник“ за проширувањето на Европската Унија бидејќи првпат по повеќе од 20 години во ист ден се одржуваат пристапни конференции со четири земји кандидати – Црна Гора, Украина, Молдавија и Албанија.
Оценувајќи ги како предводнички, таа наведе дека овие земји прават значителен напредок на европскиот пат, притоа посочувајчќи ја Црна Гора како најнапредна во пристапните преговори.
Црна Гора го затвора поглавјето 8, кое се однесува на конкуренција, и поглавјето 29 за царинската унија, со што бројот на затворени поглавја ќе достигне 18 од вкупно 33.
Ирскиот министер за европски прашања Томас Берн, чија земја од 1 јули претседава со ЕУ, изјави дека постои уверување оти пристапните преговори на Црна Гора со Европската Унија би можеле да бидат завршени до крајот на годинава.
Украина и Молдавија вчера го отворија Кластерот 6, кој ги опфаќа областите одбрана и безбедност, додека Албанија ги затвора своите први преговарачки поглавја.