Владејачкиот СДСМ денеска ја повика ВМРО-ДПМНЕ да се откаже од годишниот буџет за партиско финансирање, со цел парите да се пренаменат за борба против коронавирусот.
Координаторката на Форумот на жени на СДСМ, Снежана Калеска-Ванчева, на прес-конференција обвини дека опозицијата не води сметка за јавниот интерес и дека единствена цел има, како што вели, да шири лажни вести и да врши притисок врз институциите.
„Мицкоски и ВМРО-ДПМНЕ упорно не се откажуваат од народните пари кои од буџетот ги добиваат политичките партии. Во време кога е важен секој денар, кога треба да се покаже одговорност, Мицкоски од ништо не е спремен да се откаже. За Мицкоски и ВМРО-ДПМНЕ не е важно здравјето за граѓаните, не е важно надминувањето на економската криза. Единствено што им е важно е касата во белиот дворец да биде полна“,
изјави Калеска -Ванчева
Од ВМРО-ДПМНЕ, пак, во соопштение до јавноста уште еднаш го повторија ставот на лидерот Христијан Мицкоски, кој и претходно најави дека партијата ќе се откаже од годинешниот буџет само ако и министрите и другите државни функционери се согласат да работат пробоно во овој период.
„ВМРО-ДПМНЕ уште еднаш предлага на седницата на влада, на која ќе се расправа за Законот за финансирање партии, министрите на Заев да се откажат од своите плати. Да не заборавиме дека Оливер Спасовски зема плата од државата во вредност од 90 илјади денари, Шекеринска 80 илјади денари, а Дескоска 70 илјади денари“,
се вели во соопштението на ВМРО-ДПМНЕ во кое се критикуваат и економските мерки за намалување на последиците од коронавирусот.
Инаку, барањето за партиите да се откажат годинешниот буџет дојде на иницијатива на министерката за правда Рената Дескоска, која најави дека до Владата ќе предложи уредба со законска сила со која ќе биде укинато годишното финансирање на политичките партии, кои добиваат 0,15 отсто од буџетот.
Поврзана вест:
Заев бара партиите да се откажат од буџетските пари за партиски активности