СДСМ веќе се откажа од овие средства, а министерката за правда Рената Дескоска најави дека ќе предложи до Владата уредба со која ќе биде укинато годишното финансирање на политичките партии кое изнесува 0,15 проценти од буџетот
На прашањето дали ќе побара од коалицискиот партнер ДУИ да го поддржи предлогот на министерката за правда Рената Дескоска да се откаже од годинешниот буџет за партиски активности, лидерот на СДСМ, Зоран Заев, порача дека тоа е одлука што треба да ја донесат политичките партии, потенцирајќи дека СДСМ веќе информираше дека се откажува од парите, со цел да се пренаменат за зајакнување на здравствената заштита.
„Солидарноста треба да ја имаме како никогаш порано и парите не треба да одат во политичките партии, треба да одат кај граѓаните и СДСМ се откажа од тие пари. За ДУИ и за било која партија останува самите да кажат, навистина не можам да коментирам, ние го направивме чекорот и верувам дека сите ќе бидеме солидарни“,
порача Заев.
Министерката за правда Рената Дескоска пред два дена најави дека до Владата ќе предложи уредба со законска сила со која ќе биде укинато годишното финансирање на политичките партии, за средствата што треба да им се исплатат оваа година.
Политичките партии, според Законот за финансирање на политичките партии, добиваат 0,15 отсто од државниот Буџет.
Во конкретни бројки, тоа се од 4,5 милиони до 5 милиони евра, во зависност од годишниот буџет.
Најголем дел од овие средства или 70%, кои се обезбедени од државниот буџет, добиваат партиите што освоиле пратеници или советници на последните избори, пропорционално со бројот на пратениците или советниците што победиле.
Останатите 30% рамномерно ги делат сите политички партии што освоиле најмалку 1% од гласовите на последните парламентарни или локални избори.
Покрај тоа, државниот буџет предвидува уште по околу 280 000 евра за годишно финансирање на истражувачко-аналитички центри на политичките партии што функционираат како дел од внатрешната организација на партијата.