„А1он“ објави дека Милошоски бил осуден за две дела во Ахен, пред да стане министер за надворешни работи во владата на Груевски. Тој, пак, ги негира обвинувањата
Владејачкиот СДСМ бара оставка од пратеникот на ВМРО-ДПМНЕ Антонио Милошоски, по објавите дека тој бил осуден за фалсификување исправи во Германија.
Порталот „А1он“, објави дека Милошоски бил осуден за две дела во Ахен, Германија, пред да стане министер за надворешни работи во владата на Никола Груевски. Милошоски, пак, ги негира обвинувањата.
Портпаролката на СДСМ, Богданка Кузевска, денеска на прес-конференција рече дека доколку се покаже дека пратеникот бил навистина осуден, тој треба да се извини и да поднесе оставка.
„Освен една нејасна изјава, во стилот не сум од тука, Милошоски го нема да се произнесе за овој нов скандал. Неодговорно, молчи и Христијан Мицкоски. За овој голем срам, Милошоски не треба да бега и да се крие туку веднаш да излезе пред граѓаните. Тој има обврска за овој скандал јавно да се произнесе, исто како и Христијан Мицкоски. Какви кривични дела сторил во 2004 и 2005 година во Германија? Зошто ги криел податоците од граѓаните? Дали интензивното генерирање лажни вести е за да го прикрие сопствените криминали?“,
рече Кузевска.
Според неа, ако се потврдат овие информации, Милошоски треба јавно да се извини, да побара прошка од граѓаните и веднаш да поднесе оставка, особено што граѓаните знаат дека за него веќе има обвинение пред македонските судови.
„Правда мора да има за секој што се огрешил пред законот. Кога станува збор за политичари, одговорност прво треба да понесат пред граѓаните, а потоа пред институциите“,
вели Кузевска.
Милошоски во вчерашната изјава за „А1он“ рече дека тој во периодот во 2004-2005 година престојувал како студент во Германија, но ги негира обвинувањата дека направил кривични дела. Тој повика информациите да се проверат во Амбасадата на Германија во земјава и во германското Министерство за внатрешни работи.
Милошоски денеска вели дека информациите дека тој наводно е осуден во Германија се лажни вести.
„Истата партија која нечовечки се обиде да ја фалсификува вистината за убиството кај Смилковско Езеро, за смртта на Никола Младенов и малата Тамара, денес со слични дезинформации се обидува да измисли фалсификување на исправа во Германија, каде што сум стекнал две исправи, и тоа една факултетска диплома и еден сертификат за странски јазик. Но, најверојатно нервозата и потребата за дефокус расте токму кај власта која во Собранието е поддржана и од силувач на жени, од кого очекувам да си побараат оставка. Наместо лажни вести и обид да ја замолчат критиката од опозицијата, време е владата да си понесе одговорност за лажните ветувања кон граѓаните и за економијата која е жртва на хибридниот режим кој функционира во историски највисока корупција“,
реагира Милошоски.