Високиот претставник на германскиот Бундестаг за Западен Балкан, Мануел Сарацин, денеска оствари средба и со лидерот на ВМРО-ДПМНЕ Христијан Мицкоски. На средбата, како што информира ВМРО-ДПМНЕ, се дискутирало за актуелните политички состојби во Македонија во врска со пристапувањето кон Европската Унија.
„Ги истакнав позициите на ВМРО-ДПМНЕ за неприфатливоста на овој предлог кој владата очигледно веќе го прифатила. За нас е недозволиво историјата, јазикот и идентитетот да останат заложник на бугарските негаторски интереси. Преговорите за вклучување на Македонија во ЕУ треба да бидат врз основа на Копенхагенските критериуми, и не смее да се дозволи билатерални прашања да го оптоваруваат пристапувањето“,
стои во писмената изјава на Мицкоски која ВМРО-ДПМНЕ ја испрати до медиумите.
Сарацин, кој е во официјална посета на земјава, претходно на прес-конференција со вицепремиерот за европски прашања Бојан Маричиќ, истакна дека со францускиот предлог за надминување на спорот со Бугарија и почеток на преговорите на Северна Македонија со ЕУ, се сочувани и македонскиот јазик и македонскиот идентитет.
Ова е четврти европски функционер кој во последните три дена доаѓа за да даде поддршка за францускиот предлог и да ги потврди македонските позиции