Според Сарацин, важно е како ќе биде формулирано прашањето за донесување на уставните измени, но уште поважно е да не се потценува временскиот период за нивното донесување бидејќи, како што рекол, многу време е изгубено во регионот, а тековната динамика во ЕУ за забрзување на процесот на проширување не смее да се пропушти
Да не се потценува временскиот период за донесување на уставните измени. Многу време е изгубено во регионот, а тековната динамика во ЕУ за забрзување на процесот на проширување не смее да се пропушти. Ова денеска го кажал специјалниот германски пратеник за Западен Балкан, Мануел Сарацин, кој имаше средба со претседателот на Собранието на Република Северна Македонија, Талат Џафери.
Сарацин, како што соопштуваат од собраниската прес-служба, ја поздравил одличната соработка со германскиот Бундестаг и особено размената на искуства за собраниското обезбедување.
Тој, како што се вели во соопштението, во рамките на својата функција, ја понудил помошта и поддршката за унапредување на процесот на евроинтеграции, истакнувајќи дека Сојузна Република Германија посакува процесот на уставни измени да се заокружи што е можно поскоро.
„Имајќи ја предвид можноста за отворање преговори со Украина во декември оваа година, ризикот од одвојување на нашата земја од останатите, без исполнување на потребните европски барања е неизбежен. Од тие причини, важно е како ќе биде формулирано прашањето за донесување на уставните измени, но уште поважно е да не се потценува временскиот период за нивно донесување. Многу време е изгубено во регионот, а тековната динамика во ЕУ за забрзување на процесот на проширување не смее да се пропушти“,
рекол Сарацин.
Претседателот на Собранието, Џафери, изразил благодарност за личниот ангажман на Сарацин, како и на посветената и континуираната поддршка на Сојузна Република Германија за реализацијата на двете стратегиски цели на земјата: претходно членството во НАТО и сега актуелно, пристапувањето кон полноправно членство во Европската Унија.
На средбата, како што стои во соопштението, беше потенцирана изразено видливата парламентарна соработка со германскиот Бундестаг во последните неколку години на сите нивоа, вклучително и ИПС-стипендиската програма и проектот за независно собраниско обезбедување.
Џафери на средбата информирал и за активностите кои како земја ги преземаме во однос на обврските од членството во НАТО, за поддршката на Украина, како и за актуелниот процес за пристапување кон измена на Уставот како единствен предуслов кој треба да се заокружи за отворање на преговарачките поглавја, се наведува во соопштението.
Двајцата соговорници ја поздравиле одличната соработка на економски план и дијаспората во Сојузна Република Германија, која претставува солидна основа за поголемо зближување и соработка меѓу двете држави.
На средбата присуствувала амбасадорката на Сојузна Република Германија во Република Северна Македонија, Петра Дрекслер и генералната секретарка на Собранието на Република Северна Македонија, Цветанка Иванова.
Сарацин денеска треба да се сретне и со премиерот Димитар Ковачевски, со министерот за надворешни работи Бујар Османи, а планирана е и средба со лидерот на опозицијата Христијан Мицкоски, со кого, како што е најавено, ќе се состане во седиштето на ВМРО-ДПМНЕ.
За утре е планирана средба на специјалниот германски пратеник за Западен Балкан со вицепремиерот за европски прашања Бојан Маричиќ, како и негово учество на конференција на тема „Подобрување на Берлинскиот процес, преку парламентарна демократија“.
Сарацин, во јуни годинава, во интервју за МИА дадено на маргините на „Преспа форумот за дијалог“, рече дека Северна Македонија нема многу време за губење, бидејќи не знаеме што ќе се случи, имајќи ја предвид војната во Украина. Повторно отворање наж Преговарачката рамка со Европската Унија е целосно нереално очекување и Германија ќе биде против тоа, рече Сарацин.