Инаку, изминатиот викенд илјадници приврзаници на Санчез се собрале во Мадрид со цел да му дадат поддршка и да му изразат доверба повикувајќи го да не поднесе оставка од функцијата. „Педро, не откажувај се“, „Ти не си сам“ биле само дел од слоганите и повиците кон шпанскиот премиер
Шпанскиот премиер Педро Санчез одлучил да остане на функцијата што ја извршува од 2018 година, и покрај наводите дека неговата сопруга Бегоња Гомез е вмешана во корупција.
Минатата недела тој ги откажал сите јавни настапи и ангажмани, со цел, како што најавил, да размисли дали ќе продолжи да ја извршува функцијата премиер на Шпанија поради прелиминарната истрага која ја започнале тамошните судски власти за наводите дека неговата сопруга е дел од коруптивен скандал.
„Одлучив да продолжам, со уште поголема сила на чело на владата. Јас и мојата сопруга знаеме дека оваа дискредитирачка кампања нема да престане. Ваквата тортура ја трпиме веќе 10 години“,
рече Санчез.
Според сопругата на Санчез, обвинувањата против неа се оркестрирана кампања на малтретирање, како што додаде, предводена од десничарските медиуми.
Обвинувањата против Гомез биле упатени од организацијата „Манос лимпијас“ (Чисти раце) на Мигел Бернардо, човек поврзан со екстремната десница. И оттаму посочија дека обвинувањата можеби се лажни бидејќи се засновани на вести од интернет, од кои едната веќе е докажана дека е лажна.
Инаку, изминатиот викенд илјадници приврзаници на Санчез се собрале во Мадрид со цел да му дадат поддршка и да му изразат доверба повикувајќи го да не поднесе оставка од функцијата. „Педро, не откажувај се“, „Ти не си сам“ биле само дел од нивните слогани и повици кон шпанскиот премиер.
Одлуката на Санчез да ја преиспита можноста дали да остане на чело на шпанската влада била и изненадување и за претставниците од неговата Социјалистичка партија (ПЦОЕ).
На 16 април судијата во Мадрид отворил истрага против Бегона Гомез врз основа на текстови објавени во шпанскиот весник „Конфиденсиал“, според кои таа се сомничи дека напишала препораки до приватни компании кои аплицирале на јавни тендери, како и за релацијата со авиокомпанијата „Ер Европа“ во 2020 година додека таа била спасувана од владата со јавни пари.
Шпанските медиуми објавиле и аудиоснимки и транскрипти од состанокот на конзервативната Народна партија (ПП) и Хозе Мануел Виљареј, поранешен полициски инспектор обвинет за шпионирање и за дискредитирање на некои од шпанските политичари.
Како што пишува „Гардијан“, снимките откриваат планови за шпионирање на таткото на Бегона Гомез со цел „политички да го убијат“ Санчез.