Нешто повеќе од 2 проценти од Шпанците на кои досега им била понудена вакцина против коронавирусот ја одбиле, а во нив спаѓаат и оние кои не се вакцинирале од медицински причини.
Ваквите податоци денеска ги соопшти шпанското Министерство за здравство оценувајќи ги како исклучително позитивни.
„Ова се навистина позитивни податоци. Тоа покажува колку шпанското општество ја прифаќа и има доверба во вакцинацијата“, изјави Силвија Калзоно од Министерството за здравство.
Од почетокот на имунизацијата, Шпанија последните две недели бележи намалување на стапката на инфекција со инциденца од 206 случаи на 100 000 луѓе што е помалку за речиси 900 случаи од крајот на јануари.
Во меѓувреме, во главниот град Мадрид, на стадионот на фудбалскиот клуб Атлетико Мадрид се отвори центар за масовна вакцинација. Таму се вакцинираат полицајците, здравствените работници, пожарникарите и вработените во службите за цивилна заштита. Вакцината која се користи во овој центар е од произведувачот „Астра Зенека“.
Шпанските власти најави дека повеќето големи објекти, како што се стадионите, концертни сали и други слични објекти ќе се користат како места каде ќе се спроведува имунизацијата.
Во Шпанија досега се заразија над 3 милиони луѓе, а бројот на смртни случаи е 68 468.