Според министерот за здравство, незадоволствата кои постојат меѓу матичните лекари треба да се решаваат на маса и со конкретни предлози кои ќе бидат разгледани и дискутирани, а не преку бојкот на работата. Тој посочи оти за спроведување на измените и барањата на матичните лекари треба време, а тоа, како што посочи, е единствената работа што ја побарал од нив, но вели дека нема слух од нивна страна
Претходно матичните лекари во земјава најавија протест на работните места на 5, 6 и 7 септември (понеделник, вторник и среда) со цел да искажат револт поради повеќемесечното неисполнување на нивните барања од страна на здравствените власти
Не може преку пациенти да се бојкотира работа и да не се даваат повици за масовно земање упати и терапии, изјави денеска министерот за здравство Беким Сали откако матичните лекари во земјава најавија оти ќе протестираат на своите работни места од 5 до 7 септември поради неисполнувањето на нивните барања од страна на здравствените власт.
„Од самиот почеток кога пристапив во функцијата, првиот состанок го одржав со матичните лекари, бидејќи сметам дека се многу важен столб во здравствениот систем. Комуникацијата со нив е во континуитет, се среќаваме за различни теми, како што е ковид, но и реформа во примарната здравствена заштита“,
изјави денеска министерот одговарајќи на прашање на денешниот настан во ГОБ „8 Септември“.
Според министерот, незадоволствата кои постојат меѓу матичните лекари треба да се решаваат на маса и со конкретни предлози кои ќе бидат разгледани и дискутирани.
„Ние во изминатиот период од шест месеци веќе дискутираме. Не можеме да направиме промена во систем во период од месец дена или два, или, пак, под притисок знаејќи дека во изминатиот период ние постојано дискутиравме. Повеќе точки се предложени на влада, дадени се насоки, тоа се процедури исто како што имаме забелешки за јавните набавки исто и за измените кои треба да се направат во систем за справување со примарната здравствена заштита“,
вели Сали.
Министерот посочи оти за измените треба време, а тоа, како што посочи, е единствената работа што ја побарал од матичните лекари, но вели дека нема слух од нивна страна.
„За жал ние ќе продолжиме со нашата интензивна работа околу промените во примарната здравствена заштита. Моите колеги за жал ќе продолжат со бојкотирање, а пациентите се тие што трпат“,
додаде министерот.
Едно од барањата на матичните лекари, како што посочи Сали, е упатите кои ги издаваат да не бидат печатени бидејќи се трошело хартија, туку да биде електронски. Со тоа барање министерот посочи оти се согласуваат, но од збор до реализација, како што кажа, системот треба да овозможи и хардвер и софтвер за кој треба јавна набавка која бара време за набавување на таква опрема.
„Лесно е да се каже, од хартија во е-форма, но реализацијата шест месеци во процедури не е ништо“,
рече Сали, додавајќи дека сликата е многу поголема од тоа што матичните лекари ја прикажуваат во јавноста.
Матичните лекари во земјава најавија протест на работните места на 5,6 и 7 септември (понеделник, вторник и среда) со цел да искажат револт поради повеќемесечното неисполнување на нивните барања од страна на здравствените власти.
Според одлуката, во текот на овие три дена матичните лекари ќе бидат во своите ординации, но нема да издаваат упати и нема да пропишуваат рецепти за пациентите, затоа на лицата со хронични болести им препорачуваат да побрзаат до понеделник по рецепти за неопходните лекови.