Палестинскиот претседател Махмуд Абас го осуди американското вето како „неправедно, неетичко и неоправдано“ и во изјавата истакна дека тоа е против волјата на меѓународната заедница, која силно го поддржува полноправното членство на Палестина во ОН
Соединетите Американски Држави вчера ставија вето на полноправното членство на палестинската држава во ОН во Советот за безбедност на Обединетите нации.
САД ставија вето на нацрт-резолуцијата претставена од Алжир со која на Генерално собрание на ОН му се препорачува да ја прифати државата Палестина како членка на Обединетите нации. Велика Британија и Швајцарија беа воздржани, додека преостанатите 12 членки гласаа за резолуцијата.
„САД продолжуваат силно да го поддржуваат решението со две држави. Ова гласање не го одразува противењето на постоењето на палестинска држава, туку сугерира дека тоа ќе дојде само преку директни преговори меѓу двете страни“,
рече заменик-американскиот амбасадор во ОН Роберт Вуд.
Палестинскиот претседател Махмуд Абас го осуди американското вето како „неправедно, неетичко и неоправдано“ и во изјавата истакна дека тоа е против волјата на меѓународната заедница, која силно го поддржува полноправното членство на Палестина во ОН.
Палестинското барање за полноправно членство во ОН беше поднесено шест месеци по почетокот на војната меѓу Израел и Хамас во Газа, додека Израел ги проширува населбите на окупираниот Западен Брег.
Израелски министер: Тоа е срамен предлог
Израелскиот министер за надворешни работи Израел Кац го пофали американското вето додавајќи:
„Срамниот предлог е отфрлен. Тероризмот нема да биде награден.“
Палестинците во моментов имаат статус на набљудувач, што е де факто признавање на државноста, доделен од Генералното собрание на ОН во 2012 година. Меѓутоа, барањето за полноправно членство во ОН мора да биде одобрено од Советот за безбедност и најмалку две третини од Генералното собрание.
„Ние веруваме дека таквото признавање на палестинската државност не треба да се случи на почетокот на новиот процес, но тоа не мора да биде на самиот крај на процесот. Треба да започнеме со решавање на кризата во Газа“,
изјави пред Советот британската амбасадорка во ОН, Барбара Вудворд.
Пред гласањето за прием на Палестинците во ОН, алжирскиот амбасадор во ОН, Амар Бенџама, рече дека тоа ќе го зајакне, а не го поткопува постигнувањето на решение кое вклучува постоење на две држави и додаде „мирот во Палестина ќе дојде преку нејзино вклучување, а не нејзино исклучување“.