Премиерот Оливер Спасовски се сретна со специјалниот претставник на американскиот државен секретар за Западен Балкан, Метју Палмер, на маргините на Самитот за Западен Балкан на Европската банка за обнова и развој во Лондон
Од резултатите од реформите и од нивното спроведување се очекува позитивна и скорешна одлука на ЕУ за почеток на преговорите како логичен чекор и заради исполнувањето на сите критериуми и стандарди за членството во НАТО.
Ова го истакнал специјалниот претставник на американскиот државен секретар за Западен Балкан, Метју Палмер, денеска на средбата со премиерот Оливер Спасовски, на маргините на Самитот за Западен Балкан на Европската банка за обнова и развој во Лондон, повторувајќи ја определбата на неговата земја за поддршката на реформите и нивното спроведување во Северна Македонија.
Како што соопшти владината прес-служба, премиерот Спасовски истакна дека Северна Македонија останува посветена на исполнување на обврските од Договорот за пријателство, добрососедство и соработка со Бугарија и на договорот од Преспа со Грција, кои добија признание дека се остварени во духот на европските вредности и дека се светол пример за решавање на билатерални спорови во регионот.