„USS Gerald R. Ford“, носач на авиони на нуклеарен погон, ќе биде придружуван од уште две класи на воени бродови на морнарицата – разурнувачи со наведувани ракети и крстосувачи со наведувани ракети, наведуваат американски медиуми
Ударна група на носачи на авиони на американската морнарица се упати кон источниот Медитеран, изјави американскиот секретар за одбрана Лојд Остин, во моменти кога Израел се подготвува за голема копнена кампања против Хамас во Газа. Остин уште потврди дека САД ќе обезбедат дополнителна помош за Израел.
САД, исто така, преземаат чекори за зајакнување на присуството на борбени авиони во регионот, вклучително и ескадрили F-35, F-15, F-16 и A-10.
Неколку од овие авиони беа испратени на Блискиот Исток во последните месеци како одговор на агресијата на иранските сили низ целиот регион, вклучително и Сирија и Оманскиот Залив. Иако деталите за овој американски потег се уште не се познати, се верува дека помошта ќе опфати и бродови кои ќе можат да ги евакуираат луѓето преку морето.
Израел досега неколкупати побарал од САД воена помош. Експертите веруваат дека пакетот помош ќе вклучува и ракети кои може да ги користи израелскиот систем за противвоздушна одбрана „Железна купола“. Американските власти се во контакт и со властите во Либан и Египет, со цел на секој можен начин да се обидат да го смират конфликтот што се појавува, наведува Си-ен-ен.
Една од причините зошто САД испраќаат бродови во Израел, според аналитичарите, е да ги спречат милитантните групи како Хезболах да ја искористат ситуацијата и да го нападнат ранливиот Израел. Израел, САД и ЕУ го прогласија Хезболах за милитантна организација.
Американскиот претседател Џо Бајден, вчера во обраќање од Белата куќа се осврна на нападот на Хамас на Израел и рече дека САД стојат со Израел.
„Израел има право да се брани себеси и својот народ, точка“,
рече Бајден.
Бајден ја потврди целосната поддршка на САД за Израел, велејќи дека таа е цврста и непоколеблива.
„Никогаш нема оправдување за терористичките напади. Во овој момент на трагедија, сакам да му кажам на Хамас и на светот и на терористите насекаде: САД стојат со Израел и поддршката на мојата администрација за безбедноста на Израел е цврста и непоколеблива. Ќе се погрижиме да ја имаат потребната помош за нивните граѓани и да продолжат да се бранат“,
додаде тој.