Американскиот државен секретар Ентони Блинкен во средата ги изложи црвените линии и очекувањата на Вашингтон за опколениот крајбрежен регион во неговите најобемни коментари досега за ова прашање
Палестинците треба да управуваат со Газа откако Израел ќе ја заврши војната против Хамас, рекоа во средата САД, отфрлајќи ја идејата на израелскиот премиер Бенјамин Нетанјаху дека Израел ќе биде одговорен за безбедноста на Газа на неодредено време. Вооружени лица на Хамас од Газа ја пробија границата со Израел на 7 октомври и убија 1 400 луѓе.
Еден месец подоцна, Вашингтон започна дискусии со израелските и арапските лидери за иднината на Појасот Газа што нема да биде управувана од Хамас. Иако планот допрва треба да се појави, американскиот државен секретар Ентони Блинкен во средата ги изложи црвените линии и очекувањата на Вашингтон за опколениот крајбрежен регион во неговите најобемни коментари досега за ова прашање.
„Нема повторна окупација на Газа по завршувањето на конфликтот, нема обид за блокада или опсада на Газа, нема намалување на територијата на Газа“,
рече Блинкен на прес-конференција во Токио.
Блинкен изјави дека можеби ќе биде потребен „некој преоден период“ на крајот на конфликтот, но дека посткризното управување со Газа мора да ги вклучи Палестинците.
„Тоа мора да вклучи владеење предводено од Палестинците и обединување на Газа со Западниот Брег под палестинската управа“,
рече шефот на американската дипломатија.
Во понеделникот, Нетанјаху за Еј-би-си њуз изјави дека Израел „на неодредено време“ ќе има одговорност за безбедноста на енклавата по војната.
Израелските власти оттогаш се обидоа да разјаснат дека немаат намера да ја окупираат Газа по војната, но допрва треба да артикулираат како можат да обезбедат безбедност без да одржуваат воено присуство.
Нетанјаху вчера ја отфрли можноста за прекин на огнот во Газа, по извештаите за наводни преговори кои се во тек за привремено примирје со Хамас. Имено, светските медиуми повикувајќи се на извори блиски до завојуваните страни, објавија дека се водат преговори за ослободување на помеѓу 10 и 15 заложници држени од Хамас во замена за хуманитарна пауза во борбите.
По ваквите наводи, „Тајмс оф Израел“ објави изјава на Нетанјаху.
„Сакам да ги прекинам сите лажни гласини што ги слушаме од разни страни и јасно да повторам една работа: нема да има прекин на огнот без ослободување на нашите заложници“,
рече израелскиот премиер.