Експертите се вознемирени од едностраниот потег на администрацијата на Трамп, во однос на лекот кој се покажа како ефикасен и за новиот коронавирус
Администрацијата на американскиот претседателот Доналд Трамп го купила речиси целото количество на лекот „ремдесивир“ во светот за следните три месеци, кој се покажа ефикасен во лекувањето на новиот коронавирус.
Како што пренесува МИА, експертите се вознемирени од едностраниот потег на САД, како и од пошироките импликации, стравувајќи што ќе се случи кога еден ден ќе се појави вакцина против Ковид-19.
Лекот „ремдесивир“ првично е развиен против еболата и го произведува компанијата „Џилид сајенсис“. Тоа е прв лек кој американската Агенција за лекови го одобрила за употреба во лекувањето на коронавирусот и се покажало дека им помага на луѓето побрзо да закрепнат од болеста.
Просечната терапија за лекување на ковид-19 опфаќа шест дози со вкупна цена од 3.200 долари.
Американскиот претседател склучил „одличен“ договор со „Џилид сајенсис“ за 500.000 дози, што претставува речиси 100 отсто од вкупното производство на компанијата овој месец, 90 отсто во август и 90 проценти во септември, соопшти американското Министерство за здравство.