Воведувањето онлајн-настава зависи и од поставеноста и квалитетот на интернет мрежата, која од аспект на квалитет се разликува во урбаните и руралните средини, а тоа би ги ставило учениците во нерамномерна положба, велат од Министерството за образование
Дали може да се спаси учебната година? Одговорот на ова прашање го бара и Министерството за образование, кое сѐ уште нема план што со учениците кои ги напуштија училишните клупи како превенција од ширење на коронавирусот во земјава. Од ресорното министерство велат дека засега се организира само неформална едукација за учениците.
„Во таа насока, освен што споделивме едукативни содржини со училиштата и јавноста, донесовме и заедничка одлука за емитување на едукативната програма ‘ТВ училница’ на МРТВ. ‘ТВ училница’ почна да се емитува вчера со емисија на тема хигиена. Програмата ќе продолжи и во следите денови додека учениците и децата на претшколска возраст не одат на училиште, односно градинка и секој ден ќе бидат најавувани темите на емисиите кои ќе се емитуваат утредента. Станува збор за едукативни содржини изведени од наставните програми по сите предмети, што всушност децата требаше да ги изучуваат доколку посетуваа настава во овој период. Содржините (напоменуваме дека ќе има содржини за сите генерации ученици во основно образование) ги предаваат наставници од училиштата, а воедно емисијата има и водители. За децата на претшколска возраст се емитуваат едукативни приказни и други содржини“,
велат од МОН.
Ова е неформален тип на образование, повторуваат од МОН, за кој признаваат дека не може да го замени формалниот воспитно-образовен процес, но сметаат дека е добра алтернатива за исполнување на времето на децата додека седат дома. Оттаму ветуваат дека ќе подготват план за организирање на наставата до завршување на учебната година, но детали најавуваат за понатаму. Сметаат дека не е изводливо да се спроведе класична онлајн-настава.
„За класичната онлајн-настава не постои правна регулација, а и спроведувањето на ваков тип настава зависи од повеќе други фактори. Не сите деца особено најмалите основци поседуваат, користат и знаат да ракуваат со ИТ-уреди или, пак, имаат концентрација да следат онлајн-настава. Исто така, воведувањето на онлајн-настава зависи и од поставеноста и квалитетот на интернет мрежата, која сакале или не мораме да признаеме дека од аспект на квалитет се разликува во урбаните и руралните средини, а тоа би ги ставило учениците во нерамномерна положба“,
велат од МОН.
Наставата во сите основни и средни училишта се прекина на 11 март со одлука на Владата. Тогаш од МОН соопштија дека училиштата во наредниот период ќе добијат насоки за натамошна реализација на воспитно-образовниот процес.