Во врска со аудиоснимките што Милошоски ги достави во Обвинителството, Русковска рече дека се дадени на вештачење и соопшти дека нема да се бараат снимки од надворешните камери во Владата
Шефицата на обвинителството за гонење организиран криминал и корупција Вилма Русковска смета дека не е во ред да се користат лични имиња во кампања откако вчера на протестот на ВМРО-ДПМНЕ, Христијан Мицкоски, ги нарече неа и републичкиот обвинител Љубомир Јовески заштитници на криминалот на Зоран Заев.
„Ако има забелешка за моето постапување, доколку нема доверба во републичкиот обвинител, тоа може да го пријави во Советот на јавни обвинители“,
рече Русковска одговарајќи на новинарски прашања по денешното рочиште за организацијата на „27 април”.
Токму на протестот на ВМРО-ДПМНЕ вчера се пуштаа и аудиоснимките од доскорешниот премиер Зоран Заев кои Антонијо Милошоски во два наврати ги носеше кај Русковска.
„Првата снимка и оваа вчера се дадени на вештачење“, рече обвинителката, која побара од Милошоски да ѝ посочи и лица за сведоци.
Во врска со тоа дали ќе ги побара снимките од видеонадзорот во Владата, како што смета Милошоски дека треба да се направи, за да се види кој бил во кабинетот кај Заев, обвинителката рече дека нема да го направи тоа. Таа смета дека е несериозно да се бараат снимки од цел месец зашто, потенцираше, кој знае колку луѓе влегле во премиерскиот кабинет за толку долг период.
„Ако посочеше конкретни датуми, ќе се побараше“, рече Русковска.