Јуферев во изјава за Ројтерс рекол дека е свесен оти неговите правни напори се залудни, но дека ја поднел тужбата за да ги открие лагите на системот
Опозицискиот политичар и советник од Санкт Петербург, Никита Јуферев, побарал од обвинителот да реагира и да го испраша рускиот претседател Владимир Путин затоа што го употребил зборот „војна“ за да го именува она што Москва официјално го нарекува „специјална воена операција“ во Украина. Опозицијата го обвини Путин дека го прекршил сопствениот закон, објави Ројтерс.
Откако ја нападна Украина на 24 февруари, Русија ја нарече интервенцијата специјална воена операција, а во март беше усвоен закон кој пропишува строги казни за намерно „ширење лажни информации“ за руските вооружени сили. Овој закон ги изложи луѓето на ризик да бидат под истрага доколку војната ја нарекуваат со нејзиното име.
На прес-конференција одржана во четвртокот, Путин рекол дека целта на Москва е да се стави крај на војната.
Јуферев во изјава за Ројтерс рекол дека е свесен оти неговите правни напори се залудни, но дека ја поднел тужбата за да ги открие лагите на системот.
„За мене е важно да го сторам ова за да го свртам вниманието на противречностите и неправдата на овие закони што Путин ги потпиша, но кои тој самиот не ги почитува“,
изјави Јуферев за Ројтерс.
Тој додал дека колку повеќе се споменува, толку повеќе луѓето ќе се сомневаат во чесноста и непогрешливоста на рускиот претседател, што на крајот ќе доведе до намалување на поддршката што му ја даваат граѓаните.
Во отворено писмо опозиционерот побарал од државниот обвинител и од министерот за внатрешни работи да го обвинат Путин врз основа на законот за ширење лажни вести за акциите на руските вооружени сили.
Тој побарал од Ројтерс да не ја открива неговата локација и посочил дека критичарите на Путин, кои јавно ја нарекуваат војната војна, трпат тешки последици.
Опозиционерот Илија Јашин овој месец беше осуден на осум ипол години затвор поради ширење лажни информации за армијата. Членот на Собранието на Санкт Петербург, Алексеј Горинов, во јули беше осуден на седум години затвор поради критикување на инвазијата.