Руски воен транспортен авион пристигна во Њујорк носејќи тони медицинска опрема и маски, помош за САД во борбата против новиот коронавирус.
Рускиот претседател Владимир Путин во телефонскиот разговор со претседателот на САД, Доналд Трамп, во понеделникот понудил медицинска помош.
„Сега кога моменталната ситуација влијае и може да се окарактеризира како глобална, не постои алтернатива за заедничката работа во духот на партнерството и взаемната помош“,
истакна вчера портпаролот на Кремљ, Дмитриј Песков.
И неименуван американски претставник потврди дека пратката е директен резултат на телефонскиот разговор Трамп – Путин.
Помошта се состои од 60 тони опрема како вентилатори, маски, респиратори и друга опрема.
Во САД досега 215.344 луѓе се заболени од ковид-19, има 5.112 смртни случаи, а 8.878 лица оздравеле.
Во меѓувреме, американските сојузни држави Вашингтон, Мериленд и Вирџинија воведоа поригорозни мерки со цел да го спречат ширењето на заразата.
Мерката предвидува граѓаните да не ги напуштаат домовите, но не им е забрането да одат во продавници по основните прехранбени и медицински производи, како и да се рекреираат.
Ваква мерка досега е воведена во 33 сојузни држави, и со неа се опфатени околу 270 милиони луѓе.