Шефот на градската воена управа на Киев, Серхи Попко, рече дека нема жртви во нападот, кој бил извршен со крстосувачки ракети од областа на Каспиското Море
Русија утрово лансираше околу 15 крстосувачки ракети кон главниот град на Украина, но системите за противвоздушна одбрана ги соборија сите, соопштија украинските власти откако претходно се огласија предупредувањата за воздушен напад во поголемиот дел од земјата, пренесува Ројтерс.
Шефот на градската воена управа на Киев, Серхи Попко, изјави дека плановите на агресорите пропаднале. Денешните напади, кои се петти овој месец, се случија еден ден откако Русија го лансираше најголемиот број беспилотни летала досега.
Попко рече дека според првичните информации, нема жртви во нападот, кој бил извршен со крстосувачки ракети од областа на Каспиското Море.
Попко тврди дека Русите се обидуваат да убијат што повеќе цивили дури и на денешниот Ден на победата во Русија, еден од најсвечените национални празници таму, со кој се одбележува годишнината од поразот на нацистичка Германија во 1945 година.
Градоначалникот на Киев, Виталиј Кличко на Телеграм напиша дека остатоци од соборените ракети паднале врз куќа во областа Холосивски во југозападниот дел на Киев додавајќи дека нема жртви или голема материјална штета. Остатоци биле пронајдени и на патот во областа Шевченкивски во центарот на Киев, која е честа мета на руските напади.