Засега никој не ја презеде одговорноста за нападот, во кој според руските власти биле користени осум беспилотни летала. Нема ниту одговор од официјален Киев на обвинувањата на руското министерство за одбрана
Руското министерство за одбрана ја обвини Украина дека стои зад нападот врз Москва што се случи утрово, а во кој, како што тврдат од министерството, биле користени осум беспилотни летала.
Властите во Москва нападот го окфаливикуваа како терористички акт.
„Режимот во Киев утрово изврши терористички напад со беспилотни летала врз градот Москва. Во нападот беа употребени осум дронови. Сите непријателски дронови беа соборени. Три од нив беа онеспособени со електронски системи, изгубија контрола и го сменија правецот од предвидените цели. Уште пет беспилотни летала беа соборени од системот „Панцир-С САМ (Pantsir-S SAM) во московскиот регион“,
се наведува во соопштението на руското министерство за одбрана, објавено на Телеграм, пренесува „Гардијан“.
Градоначалникот на Москва, Сергеј Собјанин, претходно соопшти дека во нападот нема сериозно повредени лица, но дека жители на некои станбени загради кои биле оштетени во нападот, морале да бидат евакуирани, а две побарале медицинска помош. Службите за итна помош работат на местото на настанот, напиша Собјанин на Телеграм.
Во меѓувреме, руската државна новинска агенција ТАСС јави дека сообраќајот во Москва вдолж неколку улици бил затворен околу еден час поради нападите со дронови, но сега е повторно нормализиран. Новинската агенција, исто така, известува дека аеродромите во Москва работат нормално.
Засега никој не ја презеде одговорноста за нападот, а нема ниту одговор од официјален Киев на обвинувањата на руското министерство за одбрана.
Ова не е прв случај на напад со дронови на руска територија додека се водат борби во Украина по инвазијата на земјата од страна на Русија.
На почетокот на месецов беспилотни летала предизвикаа штета на седиштето на руските власти – Кремљ, напад за кој Москва ја обвини Украина опишувајќи го како обид за атентат на претседателот Владимир Путин, иако тој во тоа време не бил во зградата.
Цел на напади со дронови рано утрово бил и Киев. Градската воена управа на Киев на својот канал на Телеграм објави дека украинската престолнина била нападната со повеќе од 20 дронови, а нападот, како што соопштија, бил масовен и доаѓал од различни страни.
Исто како и во нападот на Москва, меѓу останатото, се оштетени станбени згради и куќи, а жителите се евакуирани. Во нападите, како што соопшти киевската управа, загинало најмалку едно лице, а четворица се повредени.