ЕУ на сличен начин ја иззема Србија при усвојувањето на петтиот пакет санкции против Русија во април годинава со што беше овозможено да се продолжи со непречено снабдување на домашниот пазар со нафта преку Јадранскиот нафтовод (ЈАНАФ)
Министрите за енергетика на Европската унија (ЕУ) во рамки на новиот пакет санкции кон Русија веројатно ќе одобрат и мерка со која земјите од Западен Балкан ќе се изземат од ограничувањата кои се однесуваат на руската сурова нафта. Целта на оваа мерка е да се избегне можното заобиколување на санкциите.
„За да се заштити енергетската безбедност на Западен Балкан потребно е да се предвиди отстапување што ќе овозможи транзит на руската сурова нафта преку нафтоводот низ Хрватска, под услов таквиот транзит да остане во границите на просечните транзитни нивоа од претходните години со цел да се избегне заобиколување (на санкциите)“,
пишува во предлог-мерките што ЕУ планира да ги воведе против Русија, а во кои редакцијата на „Радио Слободна Европа“ (РСЕ), имала увид.
Ваквата одредба се однесува на оние земји од регионот кои немаат излез на море и кои увезуваат сурова нафта преку Хрватска.
За овие мерки и новиот пакет санкции, министрите за енергетика ќе расправаат и одлучуваат на вонреден состанок што ќе се одржи утре (30 септември).
Мерките генерално се однесуваат ограничување на цената на нафтата и со нив ќе се воведе забрана за транспорт на нафта која е поскапа од договорената ограничена цена.
РСЕ потсетува дека при усвојувањето на петтиот пакет санкции против Русија во април годинава, ЕУ на сличен начин ја иззема Србија со што беше овозможено да се продолжи со непречено снабдување на домашниот пазар со нафта преку Јадранскиот нафтовод (ЈАНАФ).