Родители на лица со попреченост денеска се собраа во паркот наспроти Собранието и ги повикаа политичките партии да дојдат и да го потпишат нивниот документ во кој ги посочуваат главните барања за да им се олесни животот на нивните деца.
Бараат да се зголеми паричниот додаток за помош и нега, да се тргнат возрасните граници за добивање здравствени услуги и измена на законот околу одземање на деловната способност на нивните деца.
„Ние поради состојбата со ковид-19 не можевме да правиме протести и да ги потсетуваме партиите како и секоја година. Затоа денес правиме кампања за правата на лицата со попреченост, децата кои не учат на безусловна љубов и ја нарековме ‘Да создадеме свет без граници’. Сакаме да ги обврземе политичките партии, бидејќи повеќе не сакаме да веруваме на збор, сакаме да ни дадат потпис со кој ќе се заложат дека ќе ни ги исполнат барањата“
изјави Маргарита Милошеска од Гостивар, мајка на девојче со церебрална парализа и координатор во Ресурсниот центар на родители на деца со посебни потреби.
Таа изрази надеж барем поголем број политички партии ќе дојдат во паркот „Жена борец“ и ќе го потпишат нивниот документ.
Сузана Стојановска од Здружението за рехабилитација и инклузија на лица со Даунов синдром, дневен центар „Доза Среќа“, рече дека нивните барања се поголеми и се надеваат дека политичарите ќе го потпишат документот, бидејќи се во многу незавидна ситуација и од финансиски аспект, и поради тоа што тие деца се затворени дома поради ситуацијата со Ковид-19.
„Нашите барањата се скромни, ги ревидиравме и скратувавме, за да може навистина да се исполнат. Тие што ќе дојдат денеска и ќе потпишат ќе ја имаат нашата целосна поддршка“,
рече Стојановска.