Заменик-министерот за правда Оливер Ристовски смета дека Венецијанската комисија потврдила дека Законот за јазиците не е противуставен, туку таа само ја проблематизира неговата примена во судството.
Во интервју за „Слободна ТВ“, Ристовски изјави дека судството во овој момент не е подготвено да го применува тоа законско решение бидејќи нема ниту капацитет ниту опрема за тоа. Тој смета дека сепак постои рамка која овозможува негова делумна примена.
„Во овој момент, Законот за кривична постапка дава доволно права на странките (обвинетите или оштетените) да го користат својот јазик, да имаат право на превод, на преведувач, да добијат преведувани списи итн. Не сметам туку знам дека судството во овој момент нема капацитет да ги прошири тие права на останатите субјекти што учествуваат во судската постапка, а тоа се судот и обвинителството“,
изјави Ристовски.