Делегатите на Републиканската партија денеска, на почетокот на Националната конвенција во Шарлот, официјално го номинираа Доналд Трамп за кандидат на претседателските избори во САД на 3 ноември.
Претходно, официјално беше потврдена и номинацијата на Мајк Пенс за кандидат за потпретседател.
Пандемијата на коронавирусот ги наруши плановите на демократите и на републиканците да одржат големи предизборни конвенции. Републиканците, организираат скромен собир во Шарлот, со строги здравствени протоколи, со присуство на само по шест делегати од секоја сојузна држава.
Демократите, пак, сите собири ги одржуваа виртуелно.
Сепак, конвенцијата не завршува во Шарлот, бидејќи 336 делегати се поканети во Белата куќа во четврток за да проследат во живо како претседателот Трамп ја добива номинацијата од неговата партија.
На 3 ноември, Трамп и Пенс ќе се соочат со двоецот Џозеф Бајден и Камала Харис како кандидати на Демократската партија.