Од Комисијата за заразни болести најавија дека утре ќе се состанат за да ја разгледаат состојбата со грипот и големата кашлица
Нови три случаи на голема кашлица се регистрирани во државата, со што бројката се зголеми на вкупно 15 од почетокот на годината.
Преку системот за следење заразни болести, доктор Кристина Ставридис, епидемиолог од Институтот за јавно здравје во изјава за МИА вели дека се евидентирани вкупно 15 случаи од почетокот на годината.
Министерот за здравство Фатмир Меџити во одговор на новинарски прашања претходно денеска кажа дека ќе остави на професионалците да одлучуваат какви мерки ќе се преземат понатаму во врска со големата кашлица
„Не сум тој кој бара, јас се советувам со сите. На седницата на Комисијата за заразни болести ќе се разгледа каква е состојбата. Таму има врвни професионалци, јас сум невролог. Ќе оставам на професионалците кои се во таа комисија, да се одлучува како понатаму. Но, тоа што ветувам и досега што тврдев, состојбата е под контрола и ние ги надгледуваме сите состојби во здравството, не само за заразни болести. Веќе е февруари, ќе им дојде крај и на овие вируси и други состојби што го влошуваат здравјето на пациентите“,
рече Меџити денеска прашан дали утре ќе побара од Комисијата за заразни болести да се прогласи епидемија во Скопје.
Од Комисијата за заразни болести најавија дека утре ќе се состанат за да ја разгледаат состојбата со грипот и големата кашлица.
Претседателот на Комисијата за заразни болести, Александар Петличковски, минатиот месец во изјава за МИА рече дека при крајот на февруари се очекува врв на грипот и други слични вируси.
Надлежните апелираат на вакцинација како најбезбедна заштита.