Северна Македонија докажа дека е активна членка на Алијансата уште во првата година од полнопрвното членство во НАТО и ги дели заендичките вредности и принципи на сите сојузници.
Ова, во телефонските разговор, го заклучиле министерката за одбрана, Радмила Шекеринска и генералниот секретар на НАТО, Јенс Столтенберг.
„Зголемувањето на одбранбениот буџет на 1,57 отсто од БДП во 2021 година од кои 25 отсто се наменети за опремување и модернизација на Армијата, напредокот во процесот на воена интеграција во НАТО, учеството во мисиите и зголемениот придонес во мисијата КФОР на Косово, ја легитимираат Северна Македонија како кредибилен сојузник во Алијансата со значителен удел во напорите на НАТО за мир и безбедност и значаен фактор на стабилноста во регионот“,
било констатирано во разговорот, информира Министерството за одбрана.
Воената интеграција на земјата во Алијансата, додала Шекеринска, се одвива непречено, а таа е уверена дека и покрај предизвиците со пандемијата на коронавирусот, процесот ќе се заокружи до крајот на оваа година.
Брзата и ефикасна поддршка од страна на Алијансата во справувањето со последиците од пандемијата, која, меѓу другото, вклучуваше и донација на 60 транспортни респиратори од НАТО Доверителниот фонд во вкупна вредност од 1,4 милиони евра беа од голема важност за земјава, потенцирала министерката.
„Поддршката во справувањето со последиците од корона вирусот која пристигна од Алијансата, покажа дека силната солидарност и исклучително високото ниво на доверба помеѓу сојузниците се главната движечка сила на Алијансата. Сите за еден и еден за сите не е само наша заложба, тоа е принципот врз кој го градиме заедништвото“,
нагласила Шекеринска информираат од Министерството.
Телефонскиот разговор меѓу Шекеринска и Столтенберг се реализира на само еден месец пред одбележувањето на првата годишнина од членството на Северна Македонија во НАТО.