Близу две третини од испитаниците или 62 проценти ја оценуваат како „погрешна“ насоката во која се движи државата, додека за една третина или 31,5 проценти насоката е „правилна“
Безмалку 75 проценти од граѓаните планираат да гласаат на претстојните избори. Поточно, 44,2 отсто од граѓаните „многу веројатно“ ќе одат на гласање, а 30,5 „веројатно ќе излезат“, според резултатите од редовниот политички барометар на агенцијата „Брима“ за политичките ставови на населението во земјава,
Како што пренесува „Слободен печат“, и во оваа анкета најпопуларен политички лидер во земјава е премиерот и лидер на СДСМ, Зоран Заев, кој со своите 11,8 проценти од поддршката на анкетираните води пред лидерот на опозициската ВМРО-ДПМНЕ, Христијан Мицкоски, кој ужива седум отсто популарност. Меѓу етничките албански политичари, пак, „трката“ е нешто потесна. Лидерот на ДУИ, Али Ахмети, води со 5,9 проценти, а следен е претседателот на Беса, Биљал Касами со 4,4 отсто, пред опозиционерите Зијадин Села од Алијанса за Албанците (4,1 отсто) и Африм Гаши од Алтернатива со 0,4 проценти.
Општо земено, сите наши политички лидери ја немаат моќта на поопшто обединување на граѓанството, заклучуваат авторите на истражувањето.
Претседателот Стево Пендаровски предизвикува „благонаклонетост“ кај 40 проценти од анкетираните, наспроти 56,5 отсто „неблагонаклонетост“. Тоа е многу слично со комбинираниот скор на министерот за здравство Венко Филипче, за кого „благонаклон став“ изразиле речиси 41 проценти од анкетираните, а оние кои „неблагонаклоно“ гледаат на него е нешто над 56 отсто.
Доколку парламентарни избори се одржат сега, за СДСМ би гласале 19,5 проценти од испитаниците, а за ВМРО-ДПМНЕ 17,5 отсто. За ДУИ се определиле 7,2 проценти, а за Алијанса за Албанците шест отсто. За Движењето Беса и за Левица би гласале по 4,7 отсто, а последна на листата, со рејтинг од над еден процент е ДПА, за која би се изјасниле 1,1 процент од анкетираните. Сите други партии имаат поддршка под 1 процент.
„Барометарот“ покажува и дека 3,7 проценти од анкетираните нема да гласаат или „ќе пуштат неважечко ливче“ на изборите, други 12,7 отсто сѐ уште не одлучиле за кого ќе гласаат, а дека нема да гласаат се изјасниле 9,3 отсто анкетирани, 3,7 отсто не знаат дали ќе гласаат, а оние кои одбиле да одговорат на ова прашање се 7,3 проценти.
На прашањето „генерално земено, дали мислите дека работите во нашата земја се движат во правилна или погрешна насока“, близу две третини од испитаниците или 62 проценти насоката ја оценуваат како „погрешна“, додека за една третина или 31,5 проценти насоката на движење е „правилна“. Останатите немале став или не сакале да го кажат.
Запрашани, „дали сметате дека економската ситуација во вашето домаќинство е подобра, речиси иста или полоша отколку пред една година?“, 11,9 проценти рекле дека состојбите се „подобриле“, за речиси половина од испитаниците или 48,9 отсто состојбите се „исти како и лани“, а за 35,8 проценти ситуацијата „се влошила“.
Што се однесува до рангирањето на главните проблеми со кои се преокупирани анкетираните, од добиените анкетни податоци, очигледна е тенденцијата граѓаните високо на првите места да ги третираат социјалните и економски теми. Со значајно заостанување во рангирањето, следуваат проблемите од сферата на нискиот квалитет на државните услуги, распростанетоста на корупцијата и криминалот и иднината на младите.
Анкетата на „Брима“ за политичките ставови на населението во земјава во пресрет на локалните избори е теренско истражување, спроведено во периодот од 27 август до 9 септември годинава, на примерок од 1 201 испитаници.