Јанев рече дека на четири лица им е одредена активна мерка притвор, на едно лице му е одредена мерка куќен притвор, додека шестото лице сè уште не е достапно на органите на прогонот
Директорот на АНБ, Бојан Христовски, откри дека истрагата покажала оти домашната група добивала насоки од иранскиот државјанин Едрис Јахангири Маванех, за кого Христовски рече дека е поврзан со иранските безбедносно-разузнавачки служби и со иранскиот наркобос Наџи Шарифи Зиндашти

Во заедничка акција на Бирото за јавна безбедност (БЈБ) при МВР и Агенцијата за национална безбедност (АНБ) разоткриена е криминална прокси-мрежа поврзана со Иран, чии членови планирале извршување атентат врз лице во Република Грција.
Детали од десетмесечната истрага денеска на заедничка прес-конференција пренесоа директорот на БЈБ, Александар Јанев, и директорот на АНБ, Бојан Христовски.
Според информациите од безбедносните служби, со истрагата се опфатени вкупно шест македонски државјани на возраст од 29 до 73 години кои се од Скопје и од Куманово, а се лица етаблирани во криминални структури во земјава, кои по директни насоки на иранскиот државјанин преземале подготвителни логистички активности за извршување терористички акт – атентат врз претходно дефинирано лице лоцирано во Грција
Директорот на БЈБ, Јанев, рече дека во координирана акција на Одделот за сузбивање организиран и сериозен криминал и специјалната единица „Тигар“ биле извршени претреси на четири локации во земјава, при што се уапсени четири лица. Петтото лице било лишено од слобода во Грција и веќе ѝ е предадено на македонските власти, додека по шестото лице, за кое имаат сознанија дека се наоѓа надвор од државата, активно се трага.
При претресите биле пронајдени и одземени повеќе електронски уреди, меѓу кои мобилни телефони, лаптоп и персонални компјутери, уесбе мемориски уреди, тефтери со контакти, скици со означени локации, како и огнено оружје и муниција кои биле поседувани без соодветна дозвола.
„Во текот на самото постапување и службените разговори беа утврдени меѓусебна поврзаност на лицата, како и нивна поврзаност со странски државјани, меѓу кои и лица поврзани со таканаречени прокси-мрежи. Исто така, беше утврдено дека имале намера да извршат терористички акт чија цел била на територија на друга држава. За преземените активности и утврдените сознанија доставено е известување до надлежното јавно обвинителство, каде што по предлог на самото обвинителство до судијата на претходна постапка за пет лица им се одредени активни мерки“,
рече Јанев.
Јанев рече дека на четири лица им е одредена активна мерка притвор, на едно лице му е одредена мерка куќен притвор, додека шестото лице сè уште не е достапно на органите на прогонот.
Директорот на АНБ, Бојан Христовски, откри дека операцијата е спроведена во соработка со грчката Национална разузнавачка агенција и други партнерски служби. Истрагата покажала дека домашната група добивала насоки од иранскиот државјанин Едрис Јахангири Маванех, за кого Христовски рече дека е поврзан со иранските безбедносно-разузнавачки служби и со иранскиот наркобос Наџи Шарифи Зиндашти.
Нивниот начин на дејствување, додаде Христовски, вклучувал одржување конспиративни средби на територија на трети земји, вклучително и во Иран.
„Ваквите конекции, како и фактот дека во изминатиов период повеќе земји се соочија со терористички закани и напади од страна на иранските прокси-актери, е во корелација со обидите на иранските разузнавачки служби за нивно затскривање преку криминални прокси-мрежи во трети земји, вклучувајќи ја и Македонија. Согласно наведените информации, Агенцијата ќе продолжи да презема активности за идентификација на прокси-елементи од Иран, како и разоткривање на лица инволвирани во иранските прокси-мрежи“,
рече Христовски.
Одговарајќи на новинарски прашања, Христовски рече дека безбедносните служби немаат сознанија оти оваа или слична мрежа планирала напади или атентати врз лица на територијата на Македонија. Поради сензитивноста на истражниот процес, тој не ги откри детали за мотивите, односно дали осомничените дејствувале за финансиски надомест.
Јанев рече дека оваа акција е дел од континуираната соработка со АНБ, при што од крајот на 2024 година до денес се процесирани 10 случаи поврзани со тероризам, екстремизам и нелегална трговија со оружје, во кои биле опфатени вкупно 22 лица.
