Засега не е јасно дали Кирил Петков ќе биде кандидат за премиер, откако претседателката на БСП, Корнелија Нинова која и претходно беше коалициски партнер на Петков, денеска побара тој да не биде кандидат за премиер како услов да продолжат преговорите за нова влада
Претседателот на Бугарија Румен Радев утре во 17 часот по локално време ќе му го врачи мандатот на кандидатот за премиер, предложен од најголемата пратеничка група во Народното собрание – „Продолжуваме со промените“, за формирање влада во рамките на сегашниот парламент, соопштија од Кабинетот на Радев, пренесоа бугарските медиуми.
Засега не е јасно дали Кирил Петков ќе биде кандидат за премиер, откако претседателката на БСП, Корнелија Нинова која и претходно беше коалициски партнер на Петков, денеска побара тој да не биде кандидат за премиер како услов да продолжат преговорите за нова влада.
Ова барање на Нинова следи, по одлуката да се протераат 70 руски дипломати од Бугарија, за што Нинова смета дека е одлука на Петков, со која нејзината партија не се согласува.
„Петков ја запозна целата пратеничка група на БСП со целиот процес на донесување на одлуката за протерување на руските дипломати – кога почнало, во кои формати, кој учествувал и кој бил информиран. Ова не го менува нашиот став од вчера. Ќе се вратиме на преговарачка маса кога ‘Продолжуваме со промената’ ќе предложи друг кандидат за премиер. Петков рече дека денеска УО на ПП ќе заседава и ќе го реши ова прашање. Ние не се мешаме во работата на другите партии. Неговата кандидатура за премиер е едноставно неприфатлива. Одлуката не беше изгласана во Советот на министри, па рековме дека е единствена. Што е факт“,
категорична беше Нинова по денешната средба со Петков.
Петков пак, по средбата изјави дека дијалогот продолжува и дека имало непремостливи работи кои изгледале непремостливи, но дека тие се надминати.
Петков минатата недела, кога беше изгласана недоверба на Владата, изјави дека уште еднаш ќе се обидат со независните пратеници дали сакаат да бидат со нив, ако не ќе одат на избори.
За идната влада, Петков рече дека нема да преговараат со Борисов, ДПС, Преродба и ИТН.