Според бугарскиот претседател, сегашниот пристап на Владата во однос на францускиот предлог, а тоа е да се изјасни бугарското Собрание по ова прашање, води кон блокада и неможност да се донесе одлука
Претседателот на Бугарија, Румен Радев, денеска истакна дека предлозите на француското претседателство за деблокирање на европскиот пат на С Македина се „најдобри и најправедни во моментот“, повикувајќи ја бугарската Владата да се произнесе со свој став во однос на овој предлог.
„Сегашниот пристап не може да функционира. Бугарската Влада треба да даде мислење врз основа на стручноста на бугарското Министерство за надворешни работи и доколку на кој било начин ја ажурира националната рамковна позиција со своја одлука, дури потоа да ја испрати до Парламентот на одобрување, а не обратно“,
изјави Радев во Литванија, каде учествува на форумот „Три мориња“.
Според Радев, Рамковната позиција на Бугарија во 2019 година била утврдена и усвоена со одлука на тогашната бугарската Влада и потоа поддржана со Декларација одобрена од страна на тогашниот состав на Собранието.
„Навистина има напредок. Промената на Уставот на Република Северна Македонија е веќе прифатена да се случи. Во Софија никогаш не сме зборувале за малцинство, туку за рамноправност на македонските Бугари, која ја заслужуваат. Прво да се промени Уставот, па дури потоа да почнат преговорите со ЕУ“,
додаде Радев.
Според него, сегашниот пристап на Владата во однос на францускиот предлог, а тоа е да се изјасни бугарското Собрание, води кон блокада и неможност да се донесе одлука.
„Телото што ќе ја изготви на оваа одлука треба да биде бугарската Влада, а парламентот да ја одобри, а не обратно“,
додаде Радев.
Бугарскиот премиер Кирил Петков во саботата изјави дека на Самитот на ЕУ во Брисел неделава „нема да оди со став на Владата во однос на „францускиот предлог“, туку со одлука на Народното собрание“ на Бугарија.
„Предлогот на француското претседателство со ЕУ е веќе во Народното собрание на Бугарија. Пратениците ќе донесат одлука и ќе ја исполнам волјата на Народното собрание“,
рече Петков.