На прашање на која политичка сила ќе ѝ го предаде третиот мандат, по најавата на ГЕРБ ќе го врати вториот, бугарскиот претседател одговори дека ќе одлучи откако ќе се запознае со идеите на партиите
Се уште не се исцрпени сите можности за формирање влада во Бугарија. Ќе се одржат консултации со партиите застапени во парламентот, пред да биде предаден следниот мандат. Сите опции за формирање кабинет со широка парламентарна поддршка ќе бидат исцрпени, изјави денеска претседателот на Бугарија, Румен Радев, откако пропадна обидот „Има таков народ“ да состави влада, како прворангирана партија на неодамнешните избори.
„Очекувам одговорност од сите нив, сакам да видам јасна посветеност на бугарскиот парламент и ќе биде јасно кој работи за народот, а кој сее хаос“,
нагласи тој.
На прашање на која политичка сила ќе ѝ го предаде третиот мандат, по најавата на ГЕРБ ќе го врати вториот, Радев одговори дека ќе одлучи откако ќе се запознае со идеите на партиите за формирање влада.
„Буџетот е првиот важен чекор што треба да го преземе сегашното Национално собрание. Ова е главната причина за свикување на Консултативниот совет за национална безбедност. Не можеме да се однесуваме кон бугарските граѓани на неодговорен начин. Не можеме да ги оставиме луѓето во претстојна пандемиска криза без финансиска и социјална поддршка за бизнисот, здравството и медицинските лица од прва линија“,
рече Радев.