Желјасков, кој е и поранешен претседател на Народното собрание на Бугарија, го претстави предлог-кабинетот во кој ќе има премиер, еден вицепремиер и 19 министри. Во составот на владата предложени се и членови на актуелната преодна влада
Бугарскиот претседател Румен Радев утринава во претседателскиот кабинет му го врачи мандатот за состав на нова влада во Бугарија на мандатарот Росен Желјасков од коалицијата ГЕРБ-СДС, која освои најмногу гласови на последните предвремени парламентарни избори.
Желјасков, кој е и поранешен претседател на Народното собрание на Бугарија, го претстави предлог-кабинетот во кој ќе има премиер, еден вицепремиер и 19 министри. Во составот на владата предложени се и членови на актуелната преодна влада. Откако го претстави предлог-кабинетот, Желјасков побара од шефот на државата да донесе указ и да го претстави кабинетот на Народното собрание.
„Ова е голема одговорност и тест“,
изјави претседателот Румен Радев при врачувањето на мандатот за формирање влада на Росен Желјасков.
На врачувањето на мандатот, како што пренесуваат медиумите во Бугарија, Радев укажал на високо фрагментираниот парламент, како и на неподготвеноста на мнозинството граѓани да учествуваат на изборите, што неминовно влијае на легитимитетот на институциите.