Бришењето на културниот центар „Иван Михајлов“ од Централниот регистар на Северна Македонија, претходно бугарското Министерство за надворешни работи (МНР) го оцени како тенденциозно, а ја обвини земјава и дека ги крши принципите на ЕУ, односно Европската конвенција за човекови права
Oдлуката на властите во Северна Македонија да го избришат бугарскиот клуб „Иван Михајлов“ во Битола e израз на немоќ и паника, изјави денеска во Брисел бугарскиот претседател Румен Радев.
„Ова одекнува многу лошо во ЕУ. Оваа одлука е израз на паника и импотентност, бидејќи властите во Република Северна Македонија мора конечно да признаат дека има македонски Бугари и бугарско присуство во Северна Македонија не сега, туку со векови – веќе 1 300 години. И бришењето на имињата на бугарските клубови нема да ја избрише цврстата определба на Бугарија и на нашите европски партнери, Република Северна Македонија да ги вклучи Бугарите во својот Устав“,
рече тој, пренесува БГНЕС.
Бришењето на културниот центар „Иван Михајлов“ од Централниот регистар на Северна Македонија, претходно бугарското Министерство за надворешни работи (МНР) го оцени како тенденциозно, а ја обвини земјава и дека ги крши принципите на ЕУ, односно Европската конвенција за човекови права.
„Институциите во Скопје не изнесоа вистински аргументи за оспорување на регистрацијата на бугарските здруженија. Својата одлука ја донесоа исклучиво со непринципиелно, еднострано и тенденциозно ставање на имињата на здруженијата во искривен историски и идеолошки контекст. Фактот дека верувањата на Бугарите во Северна Македонија не се компатибилни со актуелната официјална идеолошка доктрина во оваа земја не значи дека овие верувања се неспојливи со демократските принципи и правниот поредок“,
соопштија од МНР на Бугарија.
Централниот регистар вчера го избриша бугарскиот центар откако министерот за правда Кренар Лога минатата недела го одби како неосновано барањето на бугарското здружение во Битола за употреба на името на Иван Михајлов во својот назив.
Ваквата одлука, пак, Лога ја донесе врз основа на претходно добиеното негативно мислење од страна на Комисијата за употреба на имиња и личности во врска со барањето за употреба на името на Иван Михајлов, поднесено од страна на здружението Културен центар ,,Иван Михајлов“ – Битола.