Договорот за сеопфатна забрана на нуклеарни тестови беше потпишан во 1996 година. Сепак, голем број земји, вклучително и Соединетите Американски Држави, сè уште го немаат ратификувано, за разлика од Русија, која го направи тоа во 2000 година, пишуваат руските медиуми
Рускиот претседател Владимир Путин потпиша закон за повлекување на ратификацијата на Договорот за сеопфатна забрана на нуклеарни тестови, пишува РИА Новости, а пренесуваат српските медиуми.
Законот за повлекување на ратификацијата на договорот на Путин му го доставил претседателот на Долниот дом на рускиот парламент, Вјачеслав Володин.
Потписот на Путин официјално го укинува членот 1 од законот „За ратификација на Договорот за сеопфатна забрана на нуклеарни тестови“, со кој се предлага ратификација на договорот, потпишан во име на Руската Федерација во Њујорк на 24 септември 1996 година.
Како што е наведено во придружните документи, усвоениот закон е изработен со цел да се воспостави паритет во однос на обврските во областа на контролата на нуклеарното оружје. Законот влегува во сила од моментот на неговото официјално објавување.
Претходно беше најавено дека, во случај на повлекување на ратификацијата на Договорот за забрана на нуклеарни тестови, Русија ќе продолжи да пренесува податоци од мониторинг-станиците за радионуклиди на нејзината територија и да добива податоци од меѓународниот систем за мониторинг, ќе функционираат сите инструменти на договорот како и досега, само за промена на статусот на Русија според Договорот.
Исто така, беше прецизирано дека Москва го задржува правото да ги продолжи нуклеарните тестови, но само како одговор на слични акции на Вашингтон.
Договорот за сеопфатна забрана на нуклеарни тестови беше потпишан во 1996 година. Сепак, голем број земји, вклучително и Соединетите Американски Држави, сè уште го немаат ратификувано, за разлика од Русија, која го направи тоа во 2000 година, пишуваат руските медиуми.
Во исто време, земјите кои поседуваат нуклеарно оружје доброволно ветија дека нема да вршат такви тестови.
Во март, заменик-министерот за надворешни работи на Руската Федерација, Сергеј Рјабков, истакна дека ситуацијата околу договорот станува сè поалармантна поради активностите на Соединетите Држави.