Македонија беше ставена на списокот со „непријателски земји“ откако земјава одлучи да ѝ воведе санкции на Руската Федерација поради нејзината инвазија на Украина
Рускиот претседател Владимир Путин денеска потпиша указ со кој се воведуваат специјални економски мерки во енергетскиот и финансискиот сектор за државјани на „непријателски држави“. Оваа уредба е објавена на официјалната интернет-страница за правни информации.
Според документот, до крајот на оваа година, на претставниците на „непријателските земји“, кои поседуваат акции во стратегиски руски претпријатија, им е забрането да вршат трансакции со овие акции. Уредбата, исто така, им забранува на инвеститорите од овие земји да тргуваат со акции на руски банки.
Во исто време, Путин ѝ даде на владата 10 дена да подготви список на банки и компании од банкарскиот и енергетскиот сектор чии трансакции со акции ќе бидат забранети за државјани од „непријателски земји“.
Сепак, во документот се вели дека трансакциите кои спаѓаат под забраната може да се овозможат со посебна дозвола од претседателот на Русија. Исто така, се додава дека периодот на важност на наметнатите ограничувања може постојано да се продолжува.
Македонија беше ставена на списокот со „непријателски земји“ откако земјава одлучи да ѝ воведе санкции на Руската Федерација поради нејзината инвазија на Украина.
Списокот постојано се ажурира и, покрај земјава, на него се САД, ЕУ, Обединетото Кралство, Украина, Црна Гора, Швајцарија, Албанија, Андора, Исланд, Лихтенштајн, Монако, Норвешка, Сан Марино, Македонија, како и Јапонија, Јужна Кореја, Австралија, Микронезија, Нов Зеланд, Сингапур, Тајван и Бахами.