„Хипократе, одиме само јас и ти!“ Ова е дел од последниот фејсбук-статус на Јадранка Бибан пред да се појави на првото рочиште во Основен Суд Скопје 2. А таму стигна по тужба од Лекарската комора, која бара одговорност од неа за изречени навреди и клевети токму на Фејсбук. Комората препознава навредувачки и клеветнички делови во шест фејсбук – статуси на Бибан објавени во текот на март годинава.
Правната застапничка на Лекарската комора, адвокат Виолета Василева од адвокатското друштво „ДЕ ЛЕГЕ“ на денешното рочиште побара и доби дозвола од Судот писмено да образложи што точно претставува навреда, а кој дел е клевета од статусите на Бибан.
„Извршниот одбор на Лекарската комора одлучи да се поднесе тужба, а поднесовме и предлог Судот со привремена мерка да и` забрани да објавува содржини со кои ќе наштети на угледот на тужителот со важност до правосилноста на пресудата. Нормално, бараме и граѓанска одговорност за изнесените навреди и клевети во објавите.“, изјави Василева.
Тужената, која пред Судот се брани сама, кажа дека по приемот на поднесокот ќе се произнесе за тужбата, па рочиштето се одложи за 10 јули годинава.
„Дали некој се чувствува навреден и наклеветен е релативна работа. Јас не знам, но можеби судот си има прописи и норми што е навреда, а што клевета и јас очекувам така и да делува. Навредата е субјективно чувство, кое е многу лошо по здравјето. Тоа чувство може да го почувствуваат луѓето, а не организациите. Затоа јас мислам дека е можеби навреден некој член на комората, ама не и сите членови. На тој навреден член треба да му се помогне да се опорави од таквата емоција. Можеби пресудата со мое казнување навистина ќе му помогне. Мене таквата пресуда не би ми сметала. Јас се ќе направам за неговото здравје. Што се однесува до лиценцата за работа со пациенти според мене, во моментов Лекарската комора треба да ми издаде лиценца со доживотна важност, за да не морам за неа да плаќам секоја година. И за сите други доктори треба да важи такво правило.“ вели Бибан.
Лекарска комора подолг период се занимава со Бибан
Јадранка Бибан е позната во јавноста по гостувања во телевизиски емисиии, каде генерално ја промовира традиционалната медицина. Во гостување на една од националните телевизии, Бибан во февруари годинава, во екот на епидемијата на морбили отворено зборуваше против вакцинацијата.
„Не можеме да создадеме вакцини, онолку колку природата може да создаде вирусни информации. Или пак, ако таа создава вирусни информации, ние ќе лупаме вакцини, 20, 30, 50, 100 сега.“, рече Бибан.
Лекарската комора со допис до медиумите извести дека Бибан нема лиценца за работа и дека со нејзините настапи кои Комората ги оценува како „спротивни на медицинските сознанија“ се загрозува националното здравје.
„Останавме вчудоневидени од сè она што го кажа почитуваната гостинка, од која можевме да чуеме сè и сешто, само не аргументи, факти и медицина базирана на докази. Според податоците во нејзиното досие во Регистерот на доктори, има завршено медицински факултет и специјализацијата по гинекологија и акушерство ѝ е заведена во 1998 година. Меѓутоа, г-ѓа Бибан нема поднесено барање за обнова на лиценца, односно нема право да работи во здравствена дејност и нема право да работи со пациенти. Таа не ги исполнува условите, кои се речиси идентични во целиот свет, па и кај нас, за некој да работи со пациенти, односно да се бави со медицина, наука која секојдневно прави големи исчекори во сите области“, соопшти Лекарската комора и ги повика медиумите да ги имаат в предвид овие факти.
Министерството за здравство истражува дали Бибан има регистрирана дејност за вршење на традиционална, домашна медицина која ја промовира, а за која мора да се има лиценца за работа од Комората за комплементарна и алтернативна медицина. Министерот за здравство Венко Филипче во март годинава за „360 степени“ изјави дека се консултира со Министерството за внатрешни работи и со обвинителството за да се преземе соодветна акција.
*поврзана вест: Во ек на епидемија на морбили, анти-вакцинална пропаганда на ТВ, Филипче се консултира со МВР и ОЈО
*поврзана вест: „360 Степени“ кај авторот на студијата која потврди дека нема поврзаност меѓу МРП вакцината и аутизмот