„Ова не е политика на Бугарија од вчера, туку ова е политика на источниот сосед која ја имаме во континуитет од 2020 година. Таму се до толку нефункционални што не можат ни избори да закажат. Ова им е седма или осма техничка влада, не можат веќе ни луѓе да најдат за техничката влада. Немам намера да одговарам на луѓе што ловат политички поени, а кои во моментов се политички маргиналци во Бугарија затоа што се претставници на влада која нема легимитет од никого“, вели вицепремиерот и министер за транспорт
Секогаш кога во Бугарија ќе дојдат избори се злоупотребува темата Македонија. Нека изберат политичка влада, ќе седнеме, ќе зборуваме со политичката влада. Ова денеска го изјави вицепремиерот и министер за транспорт Александар Николоски, одговарајќи на новинарско прашање како ја коментира последната реакција на бугарското Министерство за надворешни работи дека на властите во Скопје треба да им биде јасно оти обидите за покренување идеи за повторно преговарање на веќе преземените меѓународни обврски може да доведат само до дополнително оддалечување од почетокот на преговорите за членство во ЕУ.
„Ова не е политика на Бугарија од вчера, туку ова е политика на источниот сосед која ја имаме во континуитет од 2020 година. Таму се до толку нефункционални што не можат ни избори да закажат. Ова им е седма или осма техничка влада, не можат веќе ни луѓе да најдат за техничката влада. Прво нека ги средат дома работите“,
вели тој.
Посочи дека нема намера да одговара на луѓе што ловат политички поени, а кои во моментов се политички маргиналци во Бугарија, затоа што се претставници на влада која нема легитимитет од никого.
Од бугарското МНР вчера излегоа со соопштение дека службената влада на Република Бугарија е легитимна влада која ги има сите прерогативи за управување со земјата, кое дојде како реакција на изјавата на македонскиот премиер Христијан Мицкоски дека во октомври во Бугарија се закажани избори, а дотогаш земјата ќе има техничка (службена) влада, па затоа треба да се почека да заврши тој процес за да продолжи дијалогот меѓу двете земји кога во Софија ќе има политичка влада.
Според бугарското МНР, Софија останува отворена за дијалог, без разлика дали земјата ја води службена или редовна влада. Но, како што нагласија, тој дијалог не вклучува репреговарање на веќе преземените обврски од Скопје.
„Изјавата на премиерот на Република Северна Македонија, за жал, уште еднаш отворено ја доведува во прашање европската перспектива на неговата земја. На властите во Скопје треба да им биде јасно дека обидите за покренување идеи за повторно преговарање на веќе преземените меѓународни обврски може да доведат само до дополнително оддалечување од почетокот на преговорите за членство во ЕУ. Овој наш став нема да се смени без разлика дали ќе управува службена или редовна влада. Потсетуваме дека како резултат на непотребните провокации и конфронтации со соседните земји, Северна Македонија веќе изгуби премногу време во процесот на отворање на пристапните преговори“,
се вели во објавата од МНР на Бугарија.
Оттаму додаваат дека во летото 2022 година бил постигнат консензус меѓу 27-те земји членки на ЕУ и Северна Македонија, во кој, како што велат, целосно се опишани сите чекори за постигнување вистински напредок во процесот на европската интеграција на нашата земја.
„Бугарската позиција е јасно наведена и во Одлуката на Народното собрание од 24 јуни 2022 година, поддржана од сите политички сили. Таа е израз на волјата на бугарските граѓани да ја поддржат Северна Македонија во процесот на исполнување на критериумите за членство во ЕУ, под услов соседната земја да се придржува до највисоките стандарди во областа на човековите права и да ги исполни преземените меѓународни обврски. Оваа позиција на национално ниво нема да се промени“,
се додава во соопштението од бугарското министерство.
Мицкоски пред два дена рече и дека како влада остануваат посветени на ова прашање и оти ќе продолжат и понатаму да работат за полноправно членство во Европската Унија.
На прашањето дали има креативни решенија доколку Бугарија не сака да разговара или да репреговара за уставните измени, Мицкоски посочи дека треба да почекаме да се избере политичка влада во Бугарија, па потоа да отвориме дијалог, зашто смета дека сме соседи и треба да градиме добри соседски односи.