В среда, како што и претходно соопштија здравствените власти, почнува вакцинацијата во земјава, а од Министерството за здравство денеска соопштија и повеќе детали наведувајќи дека прв ќе се вакцинира медицинскиот персонал што работи на Инфективната клиника во Скопје.
Вакцинацијата ќе се врши во модуларната болница поставена покрај оваа клиника и ќе започне во 10 часот. Таму има шест вакцинални пункта, кои ќе работат во две смени од 8 до 20 часот, а според утврдениот план, термините за вакцинирање ќе бидат на секои 10 минути.
Вакцините ќе ги ставаат медицински тимови од Здравствен дом Скопје.
Покрај здравствените работници на Инфективна, планот предвидува во првата фаза да се вакцинираат и другите што работат во ковид-центрите во цела држава.
„Во текот на денешниот ден Националниот систем до ковид-центрите низ државата испраќа списоци каде што се наведени имиња на здравствени работници што сакаат да се вакцинираат, со точен час и ден кога треба да дојдат да ја примаат вакцината во модуларната болница. Ковид-центрите треба повратно да ги потврдат листите“,
велат од Министерството за здравство.
За секој здравствен работник што ќе прими вакцина, велат, веднаш ќе биде резервирана втора доза за ревакцинација.
Имунизацијата ќе почне со вакцини од производителот „Фајзер“ кои земјава вчера ги доби од Србија. Станува збор за 4 680 дози кои се дел од првата пратка.
„Со оваа пратка вакцини, имунизација ќе се спроведува само во модуларната болница во Скопје. Со пристигнувањето на другите дози вакцини во државата, ќе се врши дистрибуција на вакцини низ останатите здравствени домови во земјава каде што вакцинацијата ќе се спроведува во постоечките вакцинални пунктови“,
велат од Министерството.
Денеска премиерот Зоран Заев најави дека до крајот на наредната недела треба да стигнат и кинеските вакцини.
„Кинеската вакцина е во постапка на договарање. Ветувањето е дека до крајот на февруари ќе стигнат вакцините, секој ден порано за нас е важен. Додека се имплементираат овие 4 680 вакцини кои српскиот народ вчера ни ги подари, а ќе се дореализираат и останатите до 8 000, верувам дека ќе стигнат и кинеските, за целиот процес да тече континуирано. Очекувањата се од крајот на оваа, сè до крајот на идната седмица, тогаш отприлика завршува и февруари“,
изјави Заев.