Иако овие резултати сè уште не се конечни и официјални, сепак, холандскиот исход на овие избори се смета за барометар за тоа што може да се очекува и во другите европски држави. Екстремната десница се очекува да забележи голема победа и во Франција и во Италија, а може да биде втора во Германија, особено во оние земји каде што актуелни теми се миграцијата и климатските политики
Најмногу гласови на изборите за Европскиот парламент во Холандија се очекува да освои коалицијата меѓу лабуристите и зелените, која во идниот европски парламентарен состав треба да има осум места, а едно место помалку или седум места се очекува да добие екстремнодесничарската Партија на слободата на Герт Вилдерс.
Овие резултати се дел од анкетата на агенцијата Ипсос, која ги анализира резултатите од гласањето во Холандија, првата земја членка на Европската Унија каде што вчера и официјално започна гласањето, пренесува „Политико“. Централнодесничарската партија на премиерот во заминување Марк Руте, според анкетите, се очекува да освои четири мандати.
„Ние сме убедливо најголемиот победник оваа вечер“,
рече Вилдерс изразувајќи надеж дека партијата може да излезе на врвот откако ќе бидат објавени официјалните резултати на 9 јуни.
Резултатите од оваа анкета, како што пренесува „Политико“, го потврдува добриот рејтинг на Вилдерс, кој со победата на парламентарните избори во ноември минатата година ја потресе холандската политичка слика откако на претходните европски избори во 2019 година не освои ниту еден мандат.
Помалите сојузници на Вилдерс во коалицијата, десничарскопопулистичкото Движење на фармерите и центристичкото Нов социјален договор, исто така, успеаја да освојат два, односно еден мандат.
Овие анкети, според „Политико“, се потврда за предвидениот бран на екстремната десница во европските држави, што може да влијае на областите каде што се дебатира за азилот и миграцијата, како и за климатската политика.
Холандија има 31 пратеник во Европскиот парламент. Иако овие резултати сè уште не се конечни и официјални, сепак, холандскиот исход на овие избори се смета за барометар за тоа што може да се очекува и во другите европски држави. Екстремната десница се очекува да забележи голема победа и во Франција и во Италија, а може да биде втора во Германија, особено во оние земји каде што актуелни теми се миграцијата и климатските политики.
Официјалните резултати од изборите за Европскиот парламент нема да бидат објавени сè додека не заврши гласањето во сите 27 земји членки на Европската Унија на 9 јуни.
Членот на Зелените во Европскиот парламент Бас Ајкхоут и лидерот на националниот сојуз Франс Тимерманс веднаш ја коментираа анкетата за резултатите во Холандија, како поттик за останатите европски земји.
„Погледнете што направи Холандија, направете го истото“,
рече Тимерманс.
Во Холандија, за Европскиот парламент традиционално се гласа во четврток, од почит кон христијанскиот неделен одмор, еврејската сабота и муслиманската петочна молитва. Сепак, во поголем број од земјите на ЕУ, недела е денот за гласање на изборите. Но, во Ирска и Чешка се гласа во петок, во Словенија и Латвија во сабота, а во Италија во сабота и недела. Во Естонија, пак, гласачите можат да гласаат на избирачките места од понеделник, но официјалниот ден на изборите се уште е недела, 9 јуни.
Граѓаните на Европската унија излегуваат на гласање во 27 земји за да изберат нови членови на Европскиот парламент. Милиони млади луѓе ќе гласаат за прв пат. Во некои земји старосната граница за гласање е намалена на 16 години, а малолетници ќе можат да гласаат на овие избори во Белгија, Германија, Австрија, Грција и Малта.