Оние училишта што се во центарот на градот или во поблиските општини немаат многу отсутни ученици. Проблемот е поевидентен кај училиштата што се наоѓаат во подалечните општини
Изостаноците на учениците ќе се евидентираат, а потоа ќе се одлучи како тие ќе бидат заведени
Немањето јавен превоз утринава предизвика проблеми, не само за оние што одат на работа туку и за средношколците. Граѓаните беа оставени сами да се снаоѓаат за да стигнат до своите работни места. Единствена предност имаа оние што живеат во делови од градот каде што поминуваат приватните автобуси на „Слобода превоз“. Во другите делови луѓето се организираа со заеднички превоз со автомобил, такси или пеш.
Средношколците, кои добиваат бесплатен автобуски превоз, денеска не ги искористија слободните карти.
„360 степени“ праша неколку директори на средни училишта во градот како немањето јавен превоз и неможноста учениците да стигнат во училиште влијае врз наставниот процес. Оние училишта што се во центарот на градот или во поблиските општини немаат многу отсутни ученици. Проблемот е поевидентен кај училиштата што се наоѓаат во подалечните општини.
Во СУГС „Браќа Миладиновци“, кое се наоѓа во населбата Драчево, денеска има присутни само 25 отсто од учениците.
„Денеска наставата во нашето училиште нормално се реализира иако имаме присутни само 60 од вкупно 220 ученици. Немањето јавен превоз ги спречи учениците да стигнат на настава. Оние деца што живеат поблиску дојдоа пеш, но другите се зависни од јавниот превоз, а во овој дел од градот нема ниту приватни превозници што возат. Децата не се виновни што не можат да дојдат на настава“,
вели Елизабета Ангелеска, директорка на училиштето.
За тоа како овие отсуства ќе бидат евидентирани кај учениците, Ангелеска вели дека сега засега само ги евидентираат отсутните ученици, а за понатаму ќе чекаат да видат каков ќе биде ставот на Министерството за образование и така ќе ги регистрираат.
Во средното училиште „Марија Кири Склодовска“ утринава немало поголем број отсутни ученици и наставата се одвивала нормално. За во втората смена, директорот Дарко Спасов вели дека е можно да има повеќе отсуства на ученици.
„Денеска и во втора смена има ученици што доаѓаат од други делови во градот и поради немањето јавен превоз можно е да има повеќе отсуства. Инаку, утринава во нашето училиште немаше некој позначителен број отсуства“,
вели Спасов.
Во СУГС „Никола Карев“, кое се наоѓа во населбата Карпош 3, наставата утринава исто така се одвива нормално, иако има забележливо отсуство на ученици.
„Наставата редовно се одвива, иако споредено со претходните денови има забележливо отсуство на ученици. Учениците што не се дојдени се евидентираат како отсутни, а понатаму ќе се види која била причината за тоа, дали немањето јавен превоз или нешто друго“,
вели Андреј Манолев, директор на СУГС „Никола Карев“.
Директорот на СУГС „Орце Николов“, Митко Димовски, вели дека во нивното училиште утринава немало голем број отсутни ученици.
„Разговаравме со колегите и она што може да се забележи е дека има многу малку отсутни ученици. Кај нас повеќето деца живеат во оваа околина и не се зависни од јавниот превоз“,
вели Димовски.
Скопјани денеска останаа без јавен градски превоз. Автобусите останаа во своите автобази во Автокоманда и Ѓорче Петров, поради протестот на возачите кои бараат исплата на платите за септември.
За неисплатените плати на вработените во ЈСП се разговараше и на вчерашната вонредна седница на Советот на Град Скопје. Доцна попладнето беше изгласана иницијатива со која се побара од градоначалничката на Град Скопје до петок до 12 часот да достави одлука за прераспределба на средства за да се исплатат платите на вработените во ЈСП.