Истражителите на американското Министерство за правда пронајдоа уште шест доверливи документи за време на претресот на домот на претседателот Џо Бајден во Делавер, пренесува Би-Би-Си. Некои документи запленети на имотот во Вилмингтон во петокот се од неговото време како сенатор, а други од неговиот мандат како потпретседател на САД. Адвокатот на претседателот, Боб Бауер, изјавил дека меѓу одземените материјали имало и лични белешки, рачно напишани.
Претресот траел 13 часа , а во домот не биле ниту претседателот , ниту неговата сопруга.
Медиумите потсетуваат дека Бајден пред неколку дена изјави дека „не жали“ што се пронајдени доверливи документи во неговиот дом и поранешна канцеларија и дека верува дека проблемот ќе се реши.
„Не жалам. Мислам дека ќе откриете дека нема ништо таму. Целосно соработуваме и со нетрпение очекуваме брзо да го решиме ова прашање“, им рече Бајден на новинарите во четвртокот додека беше во Калифорнија за да ги согледа штетите од невремето.
Тој додаде дека документите веднаш по нивното пронаоѓање се предадени на Државниот архив. Адвокатскиот тим на Бајден минатата недела соопшти дека во ноември открил околу 10 досиеја во заклучен кабинет во центарот Пен Бајден во Вашингтон.
Два дена подоцна, на 12 јануари, Белата куќа објави дека во домот на Бајден бил пронајден втор сет на доверливи документи од неговото време како потпретседател во администрацијата на Барак Обама.
Адвокатите на претседателот пронајдоа документи во гаражата на домот на Бајден во градот Вилмингтон, Делавер, а еден доверлив документ е пронајден во соба до гаражата, соопшти тогаш Белата куќа.