На 740 вработени во индустријата за производство на канабис им се заканува отпуштање од работа затоа што фирмите не можат да продолжат да функционираат без законски да се дорегулира оваа дејност.
Од Здружението на производителите на медицински канабис „Макканабис“ денеска го повикаа претседателот на Собранието, Талат Џафери, да го стави на седница Законот за опојни дроги и психотропни супстанции и ги повикаа пратениците да го изгласаат овој Закон пред да бидат распишани изборите. Дополнително одолговлекување, рекоа од Здружението, ќе биде фатално за четириесетина лиценцирани компании кои работат во оваа област.
„Есенцијално е потребно овој закон да помине за да ја спасиме индустријата. Ги замолуваме сите парламентарни групи во Собранието сериозно да ја сфатат својата работа и во најбрз можен рок да го донесат законот“,
изјави денеска претседателот на Здружението, Костадин Дуковски.
Законот е во собраниска процедура и предвидува, меѓу другото, регулација на извозот на цвет од канабис. Во моментов, согласно постоечката регулатива, произведувачите на канабис не можат да го извезуваат цветот надвор од земјава, а домашниот пазар, пак, е сериозно ограничен. Поради ова, фирмите што добиле лиценца не можат да остваруваат профит.
„Извозот на цвет од Македонија не е дозволен, законски е забранет. Продажба во Македонија нема, немаме кому да продаваме. Има некои фирми кои прават производи од канабис, како ‘Реплек’, но купуваат цвет од надвор. Дали од нас ќе купуваат, тоа зависи од „Реплек“,
велат од „Макканабис“.
Според проценки на Здружението, компаниите што имаат лиценца за производство имаат резерви кои надминуваат 50 милиони евра. Доколку дејноста наскоро не се дорегулира со новиот закон, се плашат дека нивните загуби ќе бидат стоотстотни.
Од „Макканабис“ се сомневаат во, како што велат, задкулисни игри, кои го кочат донесувањето на законот.
„Имаме несериозен однос на институциите во Македонија кон оваа дејност. Во оваа дејност се играат игри во заднина кои не дозволуваат овој закон да биде донесен и да се овозможи развој. Зошто не се носи и се играат задкулисни игри не знаеме. Апелираме веднаш Собранието во овој состав да го донесе законот за да почнеме со развој на дејноста и да овозможиме нови вработувања“,
порачаа од Здружението.