Прогноза на „Гардијан“: Оскарот за документарен филм ќе го добие „Медена земја“

Според филмскиот критичар Питер Бредшоу, македонскиот филм ќе ги победи конкурентите во една од двете категории во кои е номиниран

„Медена земја” ќе добие Оскар за најдобар документарен филм, предвидува британски весник „Гардијан“ во прогнозите за годинашното доделување на наградите на Американската филмска академија што ќе се одржи утревечер во театарот „Долби“ во Лос Анџелес.

Според Питер Бредшоу, филмски критичар на „Гардијан“, во категоријата најдобар документарец, македонскиот филм „Медена земја“ ќе ги победи конкурентите: британско-американската копродукција „За Сама“, сириско-данскиот  „Пештерата“,  бразилскиот „На работ на демократијата“ и американскиот „Американска фабрика“.

Во втората категорија во која е номинирана „Медена земја“ – интернационален (странски/неанглиски) филм, Бредшоу предвидува дека Оскар ќе добие јужнокорејскиот филм „Паразит“.

Во оваа категорија во трка за златната статуетка се и „Корпус Кристи“ од Полска, „Клетници“ од Франција и шпанскиот „Болка и слава“.

Филмскиот критичар на Асосиејтед прес, Џејк Којл, пак, смета дека „Медена земја“ заслужува Оскар и во двете категории, но прогнозира дека тоа нема да се случи.

Церемонија на 92. доделување на Оскарите во „Долби“ театарот во Холивуд почнува утревечер во 2 часот по полноќ по македонско време, а ќе се пренесува во повеќе од 220 земји и територии во светот.