Ломбардија и нејзиниот административен центар Милано ќе прогласат завршување на епидемијата до 22 април, според очекувањата на Институтот „Ејнауди“
Според прогнозите на италијанскиот Институт „Ејнауди“ за економија и финансии, епидемијата на новиот коронавирус во земјата би завршила до 5 мај.
Епидемиолошкото сценарио на Институтот се темели врз алгоритмот кој ги зема предвид сите параметри на пандемијата, вклучувајќи го и бројот на новите случаи, хоспитализацијата, заздравувањето на пациентите и стапката на смртност. Научниците очекуваат акутната фаза на пандемијата да заврши до средината на април.
Се очекува северниот регион Трентино-Јужен Тирол да ја укине вонредната состојба на 6 април, а еден ден подоцна истото да го направат и централните региони Базиликата, Лигурија и Умбрија.
Според прогнозите, регионот Лацио ќе прекине со објавување нови случаи на коронавирусот до 16 април, а се очекува северните области Венето и Пијемонт, кои беа меѓу првите што пријавија заразени случаи, да прогласат крај на епидемијата на 14, односно на 15 април.
Најтешко погодениот регион Ломбардија и нејзиниот административен центар Милано ќе прогласат завршување на епидемијата до 22 април. Соседниот регион Емилија-Романија, кој е втор по бројот на потврдени случаи на зараза во Италија, тоа ќе го направи на 28 април, а Тоскана на 5 мај.
Италијанскиот заменик-министер за здравство Пјерпаоло Силери, еден од првите заболени со коронавирусот, вчера изјави дека врвот на епидемијата се очекува за околу седум до десет дена.
Според официјалните податоци, во последните 24 часа во Италија од ковид-19 починале 812 лица, а во истиот период се потврдени 1 648 нови случаи на зараза, што е рекордно низок број во споредба со просечните 3 000 лица дневно. Вкупниот број на заразени од почетокот на епидемијата во Италија изнесува 101 739 луѓе, а на починати 11 591.