Тој смета дека луѓето кои го гледале натпреварот, а не ја знаат темата за бугарско-македонските односи, не можат да разберат дека проблемот е многу подлабок. Вистинската борба, според него е во промената на учебниците во земјава бидејќи, како што вели, во нив Македонците ги учат дека „Бугарите се лоши луѓе, кои се варвари и сакаат да ги убијат“
Бугарија мора да има целисходна државна политика која не дозволува говор на омраза помеѓу нас и С Македонија, вели бугарскиот одбојкар, Светослав Гоцев во интервју за новинската агенција БГНЕС, во кое го коментира исвиркувањето на бугарската химна од страна на македонските навивачи за време на фудбалскиот натпревар меѓу фудбалските репрезентации одигран во понеделник. Тој во интервјуто дава и свои видувања за односите меѓу двете земји и каде треба да се насочи фокусот за нивно решавање.
Според него, оваа политика треба да биде „национален идеал и да биде натпартиска, без разлика кој е на власт – ГЕРБ, Продолжуваме со промената, ВМРО или Преродба.
„Наместо Продолжуваме со промената да пушта авиолинија Софија-Скопје и да каже дека сме големи пријатели и прашањето е решено. Се гледа дека тоа не е решено. Реално тоа (решавањето) започнува сега. Навистина сега почнува, секогаш кога Скопје отвора преговарачки поглавја за ЕУ, ние мораме да ги браниме нашите позиции“,
вели Гоцев.
Тој смета дека луѓето кои го гледале натпреварот, а не ја знаат темата за бугарско-македонските односи, не можат да разберат дека проблемот е многу подлабок.
„Проблемот е всаден дури во училиштата. Навредливи работи беа кажувани многу пред да биде прифатен францускиот предлог“,
вели одбојкарот.
Вистинската борба, според него, е во промената на учебниците во земјава бидејќи, како што вели, во нив Македонците ги учат дека „Бугарите се лоши луѓе, кои се варвари и сакаат да ги убијат“
„Тоа што го видовме на стадионот е пример од општеството, пример дека има за што да се бориме и да го смениме светогледот на овие луѓе“,
рекол Гоцев.
Она што навистина го навредува, вели одбојкарот, е тоа што „кон Македонците се однесуваме со љубов, а не го добиваме истото од нив“.
Тој дури вели дека многу негови пријатели од С Македонија му рекле дека не ги казнуваат по патиштата кога ќе дознаат дека се од Македонија.
„Им велам дека ние сме образовани, дека тие се наши браќа на кои мораме да им помогнеме. А тие ми одговараат: научени сме дека нè мразиш… Нешто не е во ред меѓу нас и нив. Трети земји и сили имаат интереси кои делат еден народ на две држави“,
изјавил Светослав Гоцев.
Осуди за исвиркувањето на бугарската химна пред почетокот на фудбалскиот натпревар меѓу С Македонија и Бугарија вчера дојдоа од повеќе бугарски политичари, меѓу кои лидерот на ГЕРБ, Бојко Борисов и лидерката на БСП, Корнелија Нинова.
Исвиркувањето на химната го осудија и министерствата за надворешни работи на двете земји, а премиерот на С Македонија, Димитар Ковачевски порача дека најдобар начин е да се навива со бодрење на својот тим и почитување на противниците.
Ковачевски рече оти смета дека не е точна перцепцијата дека Северна Македонија не реагира на провокациите од бугарска страна на ист начин како што имаше брза реакција од нашето МНР за навивањето на натпреварот во Скопје.
Натпреварот меѓу фудбалските репрезентации на двете земји се играше во понеделникот на Националната арена „Тодор Проески“ во Скопје во рамките на последното коло од групата Ц од Лигата на нации. Мечот заврши со победа на Бугарија од 1:0.