Во скопскиот јавен превоз, како што пишува во соопштението на ЈСП, од утре ќе сообраќаат 105 автобуси на приватните превозници кои ќе ги опслужуваат линиите: 23, 45, 61, 63, 73, 9, 11, 11A, 12, 47A, 55, 19, 20, 22, 52 и 54
Приватните превозници од утре се враќаат на улиците. Ваквата информација денеска преку писмено соопштение до медиумите ја соопшти Јавното сообраќајно претпријатие (ЈСП) „Скопје“.
Во скопскиот јавен превоз, како што пишува во соопштението, од утре ќе сообраќаат 105 автобуси на приватните превозници кои ќе ги опслужуваат линиите: 23, 45, 61, 63, 73, 9, 11, 11A, 12, 47A, 55, 19, 20, 22, 52 и 54.
„Денеска, в. д. директорот на ЈСП ‘Скопје’, Крсте Петревски, го потпиша договорот со приватните превозници, а веќе од утре 105 модерни автобуси, кои ги исполнуваат еколошките стандарди согласно јавниот повик, ќе сообраќаат на скопските улици“,
се додава во соопштението на ЈСП.
Враќањето на приватните автобуски превозници на скопските улици доаѓа по трите пропаднати повици кои Град Скопје ги распиша за нивно повторно вклучување во јавниот превоз, откако пред околу половина година тие престанаа да сообраќаат барајќи од ЈСП и од Градот исплата на долгот од над еден милион евра.
Првите два огласи пропаднаа оти на нив не се пријави никој, а третиот оглас пропадна поради, како што тогаш соопштија службите на Град Скопје, нецелосната документација на подносителите на апликациите.
Приватните превозници во ноември 2022 година престанаа да бидат дел од градскиот јавен превоз поради долгови што бараа да им бидат исплатени од Град Скопје. Кон крајот на ноември и почетокот на декември со повеќе од 300 автобуси паркирани на клучните крстосници го блокираа главниот град.