Кумановецот е осомничен дека го лишил од живот својот 65-годишен татко
Четириесетгодишен кумановец доби мерка притвор во траење од 30 дена затоа што е осомничен дека го лишил од живот својот 65-годишен татко. Со тоа, како што информираа денеска од Обвинителството, осомничениот сторил кривично дело убиство од член 123 став 2 точка 2 од Кривичниот законик.
„Јавниот обвинител до судијата на претходна постапка од Основниот суд во Куманово доставил предлог за определување мерка притвор за осомниченото лице кој судијата го прифатил и донел решение со кое определи мерка притвор во траење од 30 дена, оценувајќи дека лишувањето од слобода е законито“,
велат од Обвинителството.
Според Обвинителството, на 12 јануари, околу 15 часот, на улицата „438“ во Куманово, осомничениот влегол во собата во која престојувале неговите родители, зел кујнски нож и без да биде забележан од мајка си, дошол до креветот на кој спиел неговиот татко и со ножот го пробол во пределот на вратот од левата страна.
„Како резултат на здобиената повреда, оштетениот обилно искрвавил и починал, а осомничениот заминал во соседната соба каде што останал до пристигнувањето на полициските службеници“,
наведуваат од Обвинителството.
Претходно, со цел расчистување на настанот, Јавното обвинителство издаде наредба за обдукција на починатиот и вештачење на сите траги пронајдени и подигнати на самото место.
Инаку, ова беше второ убиство во земјава што се случува во период од три дена, а во кое жртви се блиски членови на семејствата на осомничените сторители.
Претходно во стан во скопската општина Карпош се случи двојно убиство, во кое осомничениот сторител, 40-годишен скопјанец, со нож ги избоде своите мајка и баба, а наредниот ден, откако станал од спиење и се уверил дека тие се мртви, сакал да го убие и својот чичко. Откако не го нашол дома, отишол кај матичната лекарка на која и раскажал што се случило.